Kaspıı mártebesi konventsııasy jańa múmkindikterdi beredi - Ázerbaıjan prezıdenti
AQTAÝ. QazAqparat - Búgin Ázerbaıjan Prezıdenti Ilham Álıevti Aqtaý sammıtinde qol qoıylǵan Konventsııanyń múmkindigine baǵa berdi, dep habarlaıdy QazAqparat.
«Kaspııdiń quqyqtyq mártebesi týraly konventsııaǵa qol qoıý - tarıhı mańyzdylyqqa ıe. Bul qujatty daıyndaýdyń barlyq kezeńinde Ázerbaıjan tarapy konstrýktıvti túrde jumys istep, ózge de Kaspıı mańy elderi sekildi ózimizdiń úlesimizdi qostyq. Sondyqtan búgin atalǵan mańyzdy qujatqa qol qoıý úshin qolaıly jaǵdaı jasalǵanyna áriptesterime alǵysymdy aıtamyn. Negizi, osy konventsııaǵa deıin de Kaspıı turaqtylyq pen qaýipsizdiktiń teńizi boldy. Atap aıtqanda, Kaspııdegi qaýipsizdike bizdiń qarym-qatynastarymyz kepildik berdi, ıaǵnı ekijaqty ári kópjaqty baılanystardy barshamyz dostyq negizde júrgizdik», - dedi ol.
Onyń paıymynsha, Kaspıı mańy elderi arasynda yntymaqtastyqtyń, ózara senimniń joǵary deńgeıi qalyptasqan. Sondyqtan bul qatynastar ary qaraı da qaýipsizdik pen turaqtylyqtyń basty kepildigi bolady.
«Endi Kaspııdegi qaýipsizdik biz qol qoıǵan Konventsııamen aıqyndalady. Árıne, bul óz kezeginde ózara tyǵyz is-qımyldarǵa tıimdi perspektıvalardy ashady. Sonymen qatar, ekonomıkalyq ári kóliktik máselelerdi sheshýge tyń serpin beriledi», - dedi I. Álıev.
Onyń atap ótýinshe, Ázerbaıjan Úkimeti Kaspıı teńiziniń lastanýyna tosqaýyl qoıý sharalaryn iske asyrýda.
«Ásirese, munaı-gaz operatsııalaryn iske asyrý kezinde ekologııa talaptaryna mán berip kelemiz. Táýelsizdik kezeńinde bizdiń el tarapynan júrgizilgen jer qoınaýyn paıdalaný sharalary halyqaralyq standarttarǵa sáıkes atqarylyp keledi», - dedi Ázerbaıjan basshysy.
Budan buryn habarlanǵandaı, Aqtaý sammıtine qatysqan bes eldiń basshylary Kaspııdiń quqyqtyq mártebesi týraly konventsııaǵa qol qoıdy.
Kaspıı mańy memleketteriniń besinshi sammıtinen keıin Elbasy Nursultan Nazarbaev Kaspıı teńiziniń quqyqtyq mártebesi týraly konventsııanyń mańyzdylyǵyn túsindirdi.
Aıte keteıik, Kaspıı mańy memleketteriniń besinshi sammıtinde Elbasy Nursultan Nazarbaev teńizdegi bıoresýrstardy qorǵaýǵa arnalǵan besjaqty qujatty bekitýdi usyndy.
