Kaspıı mańy elderi Kaspıı ekojúıesin saqtaý úshin kúsh biriktirdi
ASTANA. KAZINFORM – Búgin Kaspıı teńizi kúni atap ótilýde. Osydan 20 jyl buryn dál osy kúni Kaspıı teńiziniń teńiz ortasyn qorǵaý jónindegi negizdemelik konventsııa, ıaǵnı Tegeran konventsııasy kúshine endi.
Kaspıı teńizi kúni qarsańynda «Taza Qazaqstan» ekologııalyq mádenıetti damytý tujyrymdamasy sheńberinde «Caspian Sea Action Week 2026» halyqaralyq volonterlik aptalyǵy ótkizilýde.
Aptalyq is-sharalaryna Kaspıı mańy memleketteri – Ázerbaıjan, Reseı Federatsııasy, Iran jáne Túrikmenstannyń delegatsııalary, sondaı-aq Ózbekstan, Qyrǵyzstan jáne Tájikstan ókilderi, volonterler, ekologııalyq belsendiler, sarapshylar men jastar qatysty.
6 tamyzda Halyqaralyq volonterlik aptalyqtyń saltanatty ashylý rásimi ótti.
6–7 tamyzda ekologııalyq monıtorıngtiń zamanaýı tehnologııalaryna jáne Kaspıı mańy elderi júrgizip jatqan ǵylymı zertteýlerge arnalǵan halyqaralyq semınar men dóńgelek ústel ótti.
Іs-sharalar Kaspıı mańy memleketteriniń ókilderin, sarapshylardy, ǵalymdar men qoǵam ókilderin biriktirip, tájirıbe almasýǵa jáne Kaspıı teńiziniń biregeı ekojúıesin saqtaý maqsatynda ǵylymı yntymaqtastyqty nyǵaıtýǵa múmkindik berdi.
Kelesi kúnderi mazmundy ekologııalyq jáne aǵartýshylyq baǵdarlama júzege asyryldy. «Bir Kaspıı – bir bolashaq» fasılıtatsııalyq sessııasy jáne «Caspian Team Building» is-sharasy barysynda qatysýshylar Kaspııdi saqtaýdyń ortaq maqsattary men tásilderin talqylap, tájirıbe almasty jáne túrli elderdiń volonterlik qaýymdastyqtary arasyndaǵy ózara is-qımyldy nyǵaıtty.
Negizgi is-sharalardyń biri 8 tamyzda Aqtaý qalasynda Qazaqstan Respýblıkasy Ekologııa jáne tabıǵı resýrstar vıtse-mınıstri Mansur Oshýrbaevtyń qatysýymen ótken «Caspian Clean Challenge» halyqaralyq ekologııalyq marafony boldy. Volonterler ploggıng formatynda jaǵalaý aýmaǵynda aýqymdy tazalyq jumystaryn júrgizip, qaldyqtardy jınaý jáne suryptaýdy júzege asyrdy, sondaı-aq ekologııalyq bastamalar men jasyl tehnologııalarmen tanysty. Sol kúni «Kaspıı óńiri volonterleriniń dostyq alleıasy» ashylyp, onda 80-nen astam aǵash otyrǵyzylyp, bolashaq urpaqqa arnalǵan úndeýler jazylǵan «Ýaqyt kapsýlasy» ornalastyryldy.
9 tamyzda Bozjyra shatqalynda «Bozzhyra Clean Up» aktsııasy ótti. Qatysýshylar Mańǵystaýdyń biregeı tabıǵı landshaftarymen tanysyp, tabıǵı aýmaqtyń tazalyǵyn saqtaýǵa baǵyttalǵan ekologııalyq senbilik ótkizdi.
Aptalyq aıasynda ekologııalyq problemalardy sheshýdiń zamanaýı joldaryn izdeýge erekshe kóńil bólindi. 10–11 tamyzda «Caspian Innovation Lab» halyqaralyq hakatony ótti. Onyń qatysýshylary Kaspıı óńiriniń ekojúıesin saqtaýǵa baǵyttalǵan jobalardy ázirlep, sarapshylar nazaryna usyndy. Sonymen qatar TED formatynda ashyq mıkrofon uıymdastyrylyp, ol ekobelsendiler men sarapshylar arasynda tájirıbe almasýǵa jáne ózekti ekologııalyq máselelerdi talqylaýǵa arnalǵan alańǵa aınaldy.
Aptalyqtyń qorytyndy is-sharasy 12 tamyzda ótetin «Caspian Talks» halyqaralyq volonterler sammıti bolady. Sammıt volonterlik qozǵalys pen sarapshylar qaýymdastyǵynyń ókilderin biriktiredi. Sammıt aıasynda halyqaralyq hakaton jeńimpazdaryn marapattaý rásimi jáne tájirıbe almasý men ózekti ekologııalyq syn-qaterlerdi talqylaýǵa arnalǵan paneldik sessııa ótkiziledi. Aptalyq saltanatty jabylý rásimimen aıaqtalady.
Osylaısha, «Caspian Sea Action Week 2026» ekologııalyq aktsııalardy, volonterlik bastamalardy, saraptamalyq dıalog pen jastar yntymaqtastyǵyn biriktirgen halyqaralyq alańǵa aınaldy. Ótkizilgen is-sharalar Kaspıı teńizin saqtaý máselelerine nazar aýdarýǵa, ekologııalyq mádenıetti damytýǵa jáne óńir elderi ókilderiniń qorshaǵan ortany qorǵaý salasyndaǵy ózara is-qımylyn nyǵaıtýǵa yqpal etti.
Aıta ketelik Caspian Sea Action Week aıasynda Aqtaýda Kaspıı mańy elderiniń Dostyq alleıasy ashylǵan edi.
