Kaspıı qubyryn Reseı memleket menshigine alsa, Qazaqstan munaıy qalaı eksporttalady

ASTANA. QazAqparat – Kaspıı qubyr konsortsıýmyn Reseı memleket menshigine alsa, Qazaqstan munaıy qalaı eksporttalady? Energetıka mınıstri Bolat Aqsholaqov osy másele týraly pikir bildirdi, dep habarlaıdy QazAqparat tilshisi.

«Bul másele týraly biz eshteńe bilmeımiz. Shyndyǵynda, ol týraly bizde eshqandaı aqparat joq. Eshqashan talqylanǵan joq. Biraq munaı qubyryna kez kelgen ınfraqurylym sııaqty jumys istegen kerek. Biz úshin munaı eksporttaý múmkindiginen góri, munaı aıdaý protsesiniń úzilmeýi mańyzdy. Óıtkeni, munaı óndirý qabiletimiz ben múmkindigimiz osyǵan baılanysty. Eń bastysy tek munaı óndirý ǵana emes, ony satý kerek», - dedi Bolat Aqsholaqov QR Prezıdentin ulyqtaý rásiminiń aldynda.

Sondaı-aq, ol Qazaqstannyń munaı óndirisiniń kólemin ulǵaıtý múmkindigi týraly pikir bildirdi.

«Bári ınfraqurylymnyń daıyndyǵyna baılanysty. Birinshiden, uńǵymalardyń ózi, ekinshiden, ázirleý beketteri daıyn bolǵany kerek. Óıtkeni munaı taza kúıinde alynbaıdy. Ony ázirlep, gazdan ajyratý kerek. Bul - tutas porotsess. Munaı óndirisiniń kólemin arttyrý ınfraqurylym salýmen tikeleı baılanysty», - dedi Energetıka mınıstri.

Aıta keteıik, búgin Astanadaǵy Táýelsizdik saraıynda Qazaqstan Prezıdentiniń ulyqtaý rásimi ótti.