Kaspıı qubyry konsortsıýmynda munaı jóneltý júıesi paıdalanýǵa berildi
Munaıdy tıep-jóneltý júıesiniń jabdyǵy paıdalanýǵa berilip, shtattyq rejımde jumys isteı bastady. Bul týraly konsortsıýmnyń saıtynda jarııalandy, dep habarlaıdy QazAqparat.
Aılaq qurylǵysynyń jabdyqtaryna tehnıkalyq qyzmet kórsetý 2023 jyldyń 20 shildesinde bastaldy. Jumys barysynda eki kompensator men bir teńiz qubyrshegi aýystyryldy, bes qubyrshek jóndeldi. 10 tamyzda kompensatorlar aýystyrylǵannan keıin qurylǵy qubyrlaryn baılaýdyń gıdravlıkalyq synaqtary júrgizildi, 11 tamyz kúni aılaq qurylǵysyna jasalǵan synaq sátti aıaqtaldy.
Jumys barysynda «Arktıka» kómekshi kemesi de jumyldyryldy. Aılaq qurylǵysynyń sý astyndaǵy sońǵy manıfoldyn ashyp, jabý úshin eki súńgýir qajet boldy. Qurylǵy júıesin jýý AEGEAN MYTH tankeriniń kómegimen júzege asyrylady.
Kaspıı qubyry konsortsıýmynyń qubyr júıesi - TMD aýmaǵyndaǵy sheteldik kapıtaldyń qatysýymen júzege asyrylatyn energetıka salasyndaǵy iri ınvestıtsııalyq jobalardyń biri. Teńiz - Novorossıısk qubyrynyń uzyndyǵy 1 511 km. Osy baǵyt boıynsha Qazaqstannyń barlyq eksporttyq munaıynyń úshten eki bóliginen astamy, sondaı-aq reseılik ken oryndarynan, onyń ishinde Kaspııde ornalasqan shıkizat tasymaldanady. KQK teńiz termınaly jaǵadan edáýir qashyqtyqta, sondaı-aq, qolaısyz meteojaǵdaılarda tankerlerdi qaýipsiz júkteýge múmkindik beretin úsh shyǵarylatyn aılaq qurylǵylarymen jabdyqtalǵan.
