Kaspıı Qubyr jelisi konsortsıýmy Qashaǵan munaıyn qabyldaýǵa daıyn
Bul týraly búgin baspasóz máslıhatynda Kaspıı Qubyr jelisi konsortsıýmynyń (KQK) bas dırektory Nıkolaı Gorban málimdedi.
«Biz negizgi operator retinde Qashaǵan ken ornynan munaıdy qabyldaýǵa daıyn ekenimizdi tolyq rastaımyz. Qazan aıynyń sońyna taman, Qashaǵan munaıy kele bastaǵan tusta biz Atyraý oblysyndaǵy «NPS-4»-ti (munaı aıdaý stansysy-red.) iske qosamyz dep josparlap otyrmyz. Bul tapsyrys boıynsha suranysty tolyq qanaǵattandyrady», -dedi N.Gorban.
Bas dırektordyń aıtýynsha, Qashaǵannan tasymaldaý kútiletin munaı kólemi shamamen aıyna 600 myń tonnany quraıdy. «Qashaǵan munaıynyń sapasy konsortsıým talaptaryna sáıkes keledi dep oılaımyn», - dedi N.Gorban.
Kaspıı Qubyr jelisi kontsortsıýmy 2001 jyly iske qosylǵan bolatyn. Bul Qazaqstannyń munaı ónerkásibiniń tarıhyndaǵy asa mańyzdy oqıǵa boldy. Qubyr jelisi qazaqstandyq munaı eksportyn jetkizýdiń basym baǵyttarynyń biri bolyp tabylady. Uzyndyǵy 1510 shaqyrym KQK qubyry qazaqstandyq «Teńiz» munaı ken ornyn jáne Qara teńizdegi «Ońtústik Ozereevka» munaı termınalyn biriktiredi.
