Kaspıı qubyr konsortsıýmyndaǵy apat: eshbir munaıshy jumystan qysqarmaıdy – Bolat Aqsholaqov

NUR-SULTAN. QazAqparat – Kaspıı qubyr konsortsıýmyndaǵy bolǵan aqaýǵa baılanysty eshbir munaıshy jumystan qysqarmaıdy. Ortalyq kommýnıkatsııalar qyzmetinde ótken brıfıngide QR Energetıka mınıstri Bolat Aqsholaqov osylaı málim etti, dep habarlaıdy QazAqparat tilshisi.

«Kaspıı qubyr konsortsıýmynda jumys toqtap qalǵan kúnde jumysshylardyń taǵdyry ne bolatyny týraly mynany aıta alamyn. Qarashyǵanaq, Qashaǵan, Teńiz sııaqty kez kelgen úlken jobada josparly aıaldaý degen uǵym bolady. Kenishtiń kólemine baılanysty eki jylda nemese úsh jylda bir ret jumys aıaldaýy múmkin. Keıbir názik toraptardyń jumysy jyl saıyn bir ret toqtatylýy múmkin. Biraq kenishtegi jumystyń túgeldeı toqtaýy jospar boıynsha úsh jylda bir ret qana bolady. Onyń merzimi qalypty jaǵdaıda 30 kúnnen 60 kúnge deıin barýy múmkin. Eshkim bul kezde eshbir jumysshysyn shyǵaryp tastamaıdy. Bári shtattyq rejımde jumys isteı beredi. Sondyqtan Kaspıı qubyr konsortsıýmyndaǵy jaǵdaı aılyqtyń, jumysshylardyń qysqartylýyna ákeledi deýge múlde negiz joq. Óıtkeni bul kenishter úshin shtattyq apat desek bolady. ıAǵnı, bul kenishtegi tehnıkalyq aıaldaýlardyń shegindegi jaǵdaı», -dedi vedomstvo basshysy

Aıtýynsha, búginge deıin eshbir munaı kompanııasy qalyptasqan jaǵdaıdy alǵa tartyp, jumysshylardy qysqartý týraly bastama kótermegen.

«Eger kenish bir jyl boıy jumyssyz tursa, másele basqa. Biraq biz shekteýler týraly aıtyp otyrmyz. Bul tutas toqtatý emes. 3 aptanyń ishinde jóndeımiz dep otyr. Tipti ár aılaqqa 3 aptadan ketti degenniń ózinde 2 aıdan aspaýy kerek. Bul aralyqta eshkim eshkimdi jumystan bosatqaly jatqan joq. Bul másele turaqty baqylaýda. Tıisti oblys ákimderimen de sóılesip otyrmyz. Kásiporyndardyń eshqaısysy qyzmetkerlerin jumystan bosatý týraly áńgime kótergen joq», - dedi mınıstr.