Kaspıı qubyr konsortsıýmynda jóndeý jumystary áli bastalǵan joq - mınıstr

NUR-SULTAN. QazAqparat – Kaspıı qubyr konsortsıýmy boıynsha jóndeý jumystary ázirge bastalmady. Bul týraly Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Kaspıı qubyr konsortsıýmy boıynsha jóndeý jumystary ázirge bastalmady. Reseılik áriptesterimiz aýa raıyna baılanysty teńizdiń túbine túsýge múmkin bolmaı turǵanyn aıtyp jatyr. Sol bepti olar sáýir aıynyń ishinde búkil jumystardy aıaqtaýǵa barlyq múmkindigin salatynyn ýáde berip otyr. Atap aıtqanda, atqarylatyn jumystar anyqtaldy. Degenmen, jumysshylar brıgadasy sýdaǵy jumystardy júrgize almaı jatyr», - dedi B. Aqsholaqov Májiliste tilshiler saýalyna jaýap bere otyryp.

Osy oraıda ol aldaǵy aptada reseılik áriptesterimen kelissóz júrgizýdi josparlap otyrǵanyn aıtty.

Qazaqstandyq delegatsııa Reseıge baryp, konsýltatsııa júrgizedi.

«Sonymen qatar, jóndeý jumystaryn júrgizetin mamandar da kerek. Sondyqtan konsýltatsııa tehnıkalyq mamandar basshylyǵy deńgeıinde júrip jatyr. Bizdiń mamandar tıisti kezdesý ótkizý úshin Máskeýge bardy. Qosymsha aqparatty taǵy da habarlaımyn», - dedi vedomstvo basshysy.

Eske salsaq, naýryz aıynyń sońynda Qara teńizdegi daýyldyń saldarynan Kaspıı qubyr konsortsıýmynyń qubyr júıesine zaqym keldi.

Bul Qazaqstannyń munaı óndirý kólemi qysqarýyna alyp kelýi múmkin ekeni aıtyldy. Keıin QR Energetıka mınıstri Bolat Aqsholaqov Kaspıı qubyr konsortsıýmyndaǵy jaǵdaıdy baıandady.