Kaspıı qubyr konsortsıýmy munaı eksportyn 16,8%-ke arttyrdy

ASTANA. QazAqparat - Kaspıı qubyr konsortsıýmy 2018 jylǵy qańtar-aqpan aılarynda 9,441 mln tonna munaı eksporttap, 2017 jyldyń osy kezeńindegi kórsetkishti 16,78%-ke jaqsartty, dep habarlaıdy «QazAqparat» tilshisi KQK málimetterine silteme jasap.

Aǵymdaǵy jyldyń aqpanynda munaı eksporttaý kólemi 4,592 mıllıon tonnany qurady, al byltyr aqpanda bul kórsetkish 3,905 mln tonna bolǵan.

Kaspıı qubyr konsortsıýmy Qazaqstan munaıyn tranzıttik aımaq retindegi Reseı aýmaǵy arqyly eksporttaý úshin qurylǵan. Konsortsıýmnyń ıeligindegi 1,5 myń shaqyrymǵa sozylyp jatqan «Teńiz - Novorossıısk» qubyry Qazaqstannyń batysyndaǵy munaı kenderin Qara teńiz jaǵalaýlarymen baılanystyrady. KQK 2017 jyly 55,107 mln tonna, ıaǵnı 2016 jylǵydan 24,4%-ke artyq munaıdy eksportqa jibergen.

KQK aktsıonerleri: Reseı (PAO «Transneft» - 24% jáne «KTK Kompanı» - 7%) - 31%, Qazaqstan («QazMunaıGaz» Ulttyq kompanııasy» AQ - 19% jáne Kazakhstan Pipeline Ventures LLC - 1,75%) - 20,75%, Chevron Caspian Pipeline Consortium Company - 15%, LUKARCO B.V. - 12,5%, Mobil Caspian Pipeline Company - 7,5%, Rosneft-Shell Caspian Ventures Limited - 7,5%, BG Overseas Holding Limited - 2%, Eni International N.A. N.V. - 2% jáne Oryx Caspian Pipeline LLC - 1,75%.