Kaspıı qubyr konsortsıýmy qashan tolyq qýatta jumysyn bastaıdy

ASTANA. QazAqparat – Kaspıı qubyr konsortsıýmy qazan aıynda tolyq qýatynda jumysyn bastaıdy. Bul týraly Úkimet otyrysynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Bıyl qańtar-qyrkúıekte munaı jáne kondensat óndirý kólemi 61,9 mln tonnany qurady. Teńiz ken ornynda atalǵan kezeńde 21,5 mln tonna munaı óndirildi, bul byltyrǵy sáıkes kezeńge qaraǵanda 113,6% boldy. Qarashyǵanaq ken ornynda munaı óndirý kórsetkishi 8,5 mln tonnaǵa jetti. Al Qashaǵanda munaı óndirý kólemi 8,7 mln tonnany, ıaǵnı bıylǵy jospardyń 83 paıyzyn qurady. Bul kórsetkishtiń tómendeýi «Bolashaq» zaýytyndaǵy gaz bólý qondyrǵysynyń tamyz aıynda isten shyǵýyna baılanysty boldy», - dedi B. Aqsholaqov.

Onyń aıtýynsha, operator óndirý deńgeıin tez qalpyna keltirý boıynsha jóndeý jumystaryn júrgizip jatyr. Búginde ken orny óz qýatynyń jartysyn ǵana jumys istep jatyr.

«Bıyldyń 9 aıynda munaı eksporty 46,8 mln tonnany nemese 2021 jyldyń sáıkes kezeńimen salystyrǵanda 96 paıyzdy qurady. Ózderińiz biletindeı, búginde Kaspıı qubyr konsortsıýmynda jeke ornatylǵan 3 aılaq qurylǵysynyń bireýi ǵana jumys istep tur. Qashaǵandaǵy jóndeý jumystaryna baılanysty Kaspıı qubyr konsortsıýmynyń jeke ornatylǵan bir aılaq qurylǵysynyń jumysy qazirgi kólem úshin jetkilikti. Kaspıı qubyr konsortsıýmy osy jyldyń qazan aıynda tolyq jumys isteı bastaıdy dep eskerilip otyr», - dedi mınıstr.

Eske salsaq, buǵan deıin QR Energetıka mınıstri Bolat Aqsholaqov 15 qazanǵa deıin Kaspıı qubyr konsortsıýmy (KQK) eki jyljymaly aılaq qurylǵysyn iske qosýdy josparlap otyrǵanyn aıtqan edi.

Foto:expertsouth.ru