Kaspıı qubyr kontsortsıýmy birinshi toqsanda munaı eksportyn 14,8% ósirdi

ASTANA. QazAqparat - Kaspıı qubyr kontsortsıýmy (KQK) 2018 jyldyń qańtar-naýryz aılarynda 14,947 mıllıon tonna munaı eksporttady. Bul kórsetkish 2017 jyldyń sáıkes kezeńimen salystyrǵanda 14,86 paıyzǵa artyq, dep habarlaıdy «QazAqparat» HAA tilshisi KQK málimetine silteme jasap.

Osy jyldyń naýryz aıynda munaı eksportynyń mólsheri 5,506 mln tonnaǵa jetken. Ótken jyldyń naýryzynda atalmysh mólsher 4,929 mln tonna bolǵanyn aıta ketý kerek.

Kaspıı qubyr kontsortsıýmy Reseı aýmaǵy arqyly tranzıtpen qazaqstandyq munaıdy eksporttaý men qubyr jelisiniń qurylysyn jasaý úshin qurylǵan. KQK jalpy uzyndyǵy 1,5 myń shaqyrym bolatyn, Qazaqstannyń batysy men reseılik Qara Teńizdiń jaǵasyndaǵy ken oryndaryn jalǵaıtyn Tengız-Novorossıısk munaı qubyryna ıe. 2017 jylǵy KQK munaı tıeliminiń mólsheri 55,107 mln tonnaǵa jetken. Bul 2016 jylǵy kórsetkishpen salystyrǵanda 24,4 paıyzǵa artyq.

KQK aktsıonerleriniń qataryn Reseı Federatsııasy - 24%, «QazMunaıGaz» Ulttyq kompanııasy» AQ - 19%, Chevron Caspian Pipeline Consortium Company - 15%, LUKARCO B.V. - 12,5%, Mobil Caspian Pipeline Company - 7,5%, Rosneft-Shell Caspian Ventures Limited - 7,5% jáne «KQK Kompanı» - 7%, BG Overseas Holding Limited - 2%, «Enı Interneshnl N.A N.V. S.ar.l.» - 2%, Kazakhstan Pipeline Ventures LLC - 1,75% jáne Oryx Caspian Pipeline LLC - 1,75% tolyqtyrady.