Kaspıı qubyryna jasalǵan shabýyldy jaqtaýshylardyń isi qaı satyda – mınıstrdiń jaýaby
ASTANA. KAZINFORM – Premer-mınıstrdiń orynbasary – Mádenıet jáne aqparat mınıstri Aıda Balaeva Májilis depýtatynyń saýalyna bergen jaýapta áleýmettik jelide Kaspıı qubyr konsortsıýmyna jasalǵan shabýyldy jaqtap pikir jazýshylardyń isi qandaı satyda ekenin aıtty.
- 2025 jyldyń 17 jeltoqsanynda Astana qalasynyń polıtsııa departamenti belgisiz tulǵalardyń áleýmettik jelige memleket pen azamattar úshin asa mańyzdy ınfraqurylymǵa jasalǵan shabýyldy qoldaǵan pikir qaldyrýy faktisi boıynsha Qylmystyq kodekstiń 174-baby boıynsha (Áleýmettik, ulttyq alaýyzdyqty órshitý) qylmystyq isti tirkedi. Jarııalanymdar men pikirlerge sot-psıhologııalyq-fılologııalyq saraptama taǵaıyndaldy. Qazir sotqa deıingi tergep-tekserý organy joǵaryda atalǵan pikirlerdi qaldyrǵan belgisiz tulǵalardyń kim ekenin anyqtaý baǵytynda sharalar qabyldap jatyr.
Sotqa deıingi tergep-tekserý organy atalǵan áreketterdi Qylmystyq kodekstiń 175-inshi jáne 256-baptary boıynsha saralaýǵa negiz tapqan joq, - deıdi Aıda Balaeva.
Onyń aıtýynsha, is qazir Іshki ister mınıstrliginiń baqylaýynda. Buǵan deıin Bas prokýror Berik Asylov Kaspıı qubyr jelisine jasalǵan shabýylǵa qatysty jaǵymsyz pikir aıtqandarǵa qatysty tergep-tekserý jumystary júrip jatqanyn málimdegen bolatyn.