Kaspıı qubyryna shabýyl jasalmaıtyn boldy

ASTANA. KAZINFORM – Kaspıı qubyr konsortsıýmy Reseı men Ýkraına arasynda ýaqytsha shabýyl jasalmaıtyn nysandar tizimine endi.

25 naýryz kúni Kreml saıtynda Reseı men Ýkraınadaǵy energetıkalyq júıege soqqy jasaýǵa ýaqytsha moratorıı qoldanylatyn nysandar tizimi jarııalandy.

Atalǵan tizimniń 2-tarmaǵynda «Munaı jáne gaz qubyrlary men qoımalary, sonyń ishinde sorǵy stantsııalary» dep kórsetilgen.

— Ýaqytsha moratorıı 2025 jylǵy 18 naýryzdan bastap 30 kúnge jaramdy jáne ózara kelisim boıynsha uzartylýy múmkin. Eger taraptardyń biri moratorıı sharttaryn buzsa, ekinshi tarap ony oryndaý mindetinen bosatylady, — dep jazylǵan Kreml saıtynda.

Buǵan deıin Kaspıı qubyr konsortsıýmynyń baspasóz hatshysy Ilıa Arhıpov «Kropotkınskaıa» sorǵy stantsııasyndaǵy jaǵdaı ózgerissiz ekenin málimdegen bolatyn. Stantsııa qyzmeti toqtap tur, qalpyna keltirý jumystary júrgizilip jatyr. Munaı qubyry jumys istep, tıeý-jóneltý qalypty rejımde júrip jatyr.

Eske sala ketsek, bıyl 17 aqpanda Kaspıı qubyr konsortsıýmynyń munaı aıdaý stansasyna dronmen shabýyl jasaldy.

Keıin Energetıka mınıstrligi KQK-ǵa jasalǵan kezekti dron shabýylyna qatysty túsinik berdi.

Sondaı-aq Kaspıı qubyry konsortsıýmyna kelgen shyǵyn kásiporynnyń óz esebinen ótelgeni aıtyldy.

24 naýryzda Kaspıı qubyry konsortsıýmyna dron shabýylynan keıin munaı aıdaý stantsııasyn qalpyna keltirip jatqany týraly habarlaǵan edik.