Kaspıı qubyr jelisine jasalǵan shabýylǵa qatysty jaǵymsyz pikir aıtqandar tergelip jatyr — Bas prokýror
ASTANA. KAZINFORM — Kaspıı qubyr jelisine jasalǵan shabýylǵa qatysty jaǵymsyz pikir aıtqandardy tergep-tekserý júrip jatyr. Bul týraly Májilis depýtattarynyń saýalyna Bas prokýror Berik Asylovtyń jaýabynda aıtylǵan.
— 2025 jylǵy 17 jeltoqsanda Astana qalalyq polıtsııa departamenti Kaspıı qubyr jelisi konsortsıýmyna zalal keltirýilýine baılanysty azamattardyń jaǵymsyz pikirler aıtý faktileri boıynsha Qazaqstan Respýblıkasynyń Qylmystyq kodeksiniń 174-baby 1-bóligi (ulttyq alaýyzdyqty qozdyrý) boıynsha sotqa deıingi tergep-tekserýdi bastaǵanyn habarlaımyz. Sotqa deıingi tergep-tekserý barysynda bul adamdardy anyqtaý jəne olardyń kinəsin rastaıtyn dəleldemelerdi jınaý boıynsha tıisti sharalar júrgizilip jatyr. Nətıjesi boıynsha olardyń əreketteri túpkilikti saralanyp, protsestik sheshim qabyldanady, — dedi Bas prokýror jaýabynda.
Onyń atap ótýinshe, Bas prokýratýra mass-medıada zańsyz kontenti bar jalǵan aqparat pen basqa da jarııalanymdardy taratýǵa jol berilmeıtini, sondaı-aq mundaı əreketter úshin qylmystyq jəne əkimshilik jaýaptylyq kózdeletini týraly eskertetin baspasóz habarlamasyn jarııalaǵan.
— Azamattarmen osyndaı túsindirý jumystaryn jergilikti prokýrorlar turaqty túrde júrgizip keledi. Mədenıet jəne aqparat mınıstrligi de óz tarapynan halyq arasynda mass-medıa arqyly, onyń ishinde sizder kótergen məseleler boıynsha túsindirý jumystaryn júrgizýde. Ol týraly sizderge atalǵan vedomstvo aqparat beretin bolady, — dedi Berik Asylov.
Aıta keteıik, ótken jyldyń jeltoqsan aıynda Bas prokýrordyń atyna saýal joldaǵan Májilis depýtaty Erlan Saırov Berik Asylovtan Qazaqstan úshin asa mańyzdy sanalatyn ınfraqurylymdyq nysanǵa shabýyl jasaýǵa jarııa túrde shaqyrǵan azamattardyń is-áreketine quqyqtyq baǵa berýdi suraǵan edi.
Esterińizge sala ketsek, 2025 jyldyń qarasha aıynda Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy.