Kaspıı qubyr konsortsıýmynyń qurylǵysy ýaqytsha jóndelip jatyr

 ASTANA. KAZINFORM – Kaspıı qubyr konsortsıýmynyń (KTK) Teńiz termınalynda KQK-3 shyǵarma aılaq qurylǵysyndaǵy qalqymaly jáne sýasty shlangyny josparǵa saı aýystyrý jumysy bastaldy.

Kompanııa habarlaǵandaı, qurylǵy qolaıly aýa raıy jaǵdaıynda jóndeý jumystarynyń qaýipsizdigin qamtamasyz ete otyryp, úsh apta merzimge paıdalanýdan shyǵaryldy.

18 shildede KQK-3 aılaq qurylǵysy da josparly-profılaktıkalyq jóndeýge shyǵarylǵan bolatyn. Ol kezde eki gıdrokompensator aýystyrylyp, aılaq qurylǵysy shtattyq rejımde jumysyn jalǵastyrdy.

Sonymen qatar, konsortsıým júk jóneltýshilerin munaı óndirý men tasymaldaýdy úzdiksiz qamtamasyz etý úshin jóndeý jumysy týraly aldyn ala habar berip otyr.

Elimizdiń Energetıka mınıstrligi Teńiz – Novorossıısk qubyry arqyly munaı tasymaldaý kestesin qurý barysynda KQK obektisindegi josparly-profılaktıkalyq jóndeý merzimin eskeredi.

14 tamyzda Reseı teńiz keme qatynasy tizilimi (RMRS) KQK-2 aılaq qurylǵysyna FAÝ sheńberinde klasyn qalpyna keltirý maqsatynda tekseris júrgizdi. Jumys toqtap turǵan kezde barlyq qalqymaly jáne sýasty shlangiler, sondaı-aq eki gıdrokompensator aýystyryldy. Nátıjesinde KQK-2 aılaq qurylǵysynyń klasy qalpyna keltirilip, búginde shtattyq rejımde jumys istep tur.

Aıta keteıik, qazir munaı jóneltý KQK-1 jáne KQK-2 aılaq qurylǵylary arqyly júzege asyrylyp jatyr.

Eske sala ketsek, bıyl kóktemde Kaspıı qubyr konsortsıýmy eki qurylǵynyń jumysyn ýaqytsha toqtatqan edi.

Sondaı-aq Kaspıı qubyr konsortsıýmy arqyly munaı aıdaý kólemi 81,5 mln tonnaǵa deıin artatyny aıtyldy.