Kaspıı qubyr konsortsıýmynda munaı tasymaldaýda shekteý bar ma — mınıstrlik jaýaby

ASTANA. KAZINFORM — Energetıka vıtse-mınıstri Erlan Aqbarov Reseıdiń Novorossıısk portyndaǵy tótenshe jaǵdaıǵa baılanysty túsinik berdi. 

— Bul jaǵdaı Úkimettiń erekshe baqylaýynda. Qazirgi ýaqytta tasymaldaý birqalypty júrip jatyr. Bir aılaq tolyq jumys istep tur. Al ekinshi aılaqty júıege qosý jumystary istelip jatyr. Atap aıtqanda, tasymaldaýǵa eshqandaı shekteý joq, — dedi Erlan Aqbarov Senatta tilshiler suraǵyna jaýap bere otyryp.

Onyń aıtýynsha, keltirilgen shyǵyndy esepteýge qatysty is-sharalar qarastyrylyp jatyr.

Eske salsaq, 2025 jylǵy 29 qarasha kúni Astana ýaqytymen saǵat 06:06–da Kaspıı qubyr konsortsıýmynyń (KQK) Novorossıısk mańyndaǵy teńiz ınfraqurylymyna qashyqtan basqarylatyn sý kólikterimen shabýyl jasalǵan. Shabýyl saldarynan ekinshi syrtqy aılaq qurylǵysy (VPÝ-2) aıtarlyqtaı zaqymdanǵan. Qondyrǵy tolyq jóndeý jáne qalpyna keltirý jumystary júrgizilgenge deıin paıdalanýdan shyǵarylǵan.