Kaspıı qubyr konsortsıýmyna jasalǵan shabýylǵa baılanysty Qazaqstan narazylyq bildirdi
ASTANA. KAZINFORM – Qazaqstan Respýblıkasy Syrtqy ister mınıstrliginiń resmı ókili Aıbek Smadııarov Kaspıı qubyr konsortsıýmyna jasalǵan shabýylǵa qatysty málimdeme jasady.
Mınıstrlik Novorossıısk teńiz porty akvatorııasynda halyqaralyq Kaspıı qubyr konsortsıýmynyń asa mańyzdy ınfraqurylymyna baǵyttalǵan kezekti maqsatty shabýylǵa baılanysty resmı túrde narazylyq bildirdi. Bul – halyqaralyq quqyq normalarymen qorǵalatyn azamattyq nysanǵa qarsy jasalǵan úshinshi agressııalyq akt.
Qazaqstan jahandyq energetıkalyq naryqtyń jaýapty qatysýshysy retinde energııa resýrstaryn turaqty jáne úzdiksiz jetkizýdiń mańyzdylyǵyn erekshe atap ótti. Kaspıı qubyr konsortsıýmy álemdik energetıkalyq júıeniń turaqtylyǵyn qamtamasyz etýde aıryqsha oryn alady.
«Osy oqıǵany Qazaqstan Respýblıkasy men Ýkraınanyń ekijaqty qatynastaryna zalal keltiretin áreket retinde baǵalaımyz jáne ýkraın tarapy mundaı jaǵdaılardyń qaıtalanýyna jol bermeý úshin naqty sharalar qabyldaıdy dep kútemiz», – dedi Aıbek Smadııarov.
Aıta keteıik, buǵan deıin KQK taǵy shabýylǵa ushyrap, júk tıeý-qabyldaý qurylǵysy zaqymdanǵany habarlandy.
Keshe osy oqıǵaǵa baılanysty QR Energetıka mınıstrligi túsinikteme berip, jaǵdaı Qazaqstan Úkimetiniń erekshe baqylaýynda ekenin aıtqan bolatyn.