Kaspıı qubyr konsortsıýmyna jasalǵan dron shabýyly: SІM málimdeme jasady

ASTANA. KAZINFORM – Qazaqstan Kaspıı qubyr konsortsıýmynyń munaı stantsııasyna jasalǵan dron shabýyly boıynsha Ýkraına tarapyna alańdaýshylyq tanytty. Bul týraly Syrtqy ister mınıstriniń orynbasary Álibek Qýantyrov málim etti.

– Biz alańdaýshylyǵymyzdy Ýkraına tarapyna jetkizdik, olardyń habary bar. Iá, bul ınfraqurylymǵa shabýyl jasaldy, bul túsinikti jaǵdaı. Alaıda qazir Kaspıı qubyr konsortsıýmy qalypty rejımde jumys istep tur. Biz munaıdy eksporttap jatyrmyz. Eger mundaı jaǵdaı taǵy qaıtalanatyn bolsa, máseleni taǵy kóteremiz, – dep jaýap berdi Álibek Qýantyrov Májilis otyrysynan keıin ótken baspasóz máslıhatynda.

Eske salaıyq, bıyl 17 aqpanda Kaspıı qubyr konsortsıýmynyń munaı aıdaý stansasyna dronmen shabýyl jasaldy. 

Keıin elimizdiń Syrtqy ister mınıstrligi Kaspıı qubyr konsortsıýmynyń munaı aıdaý stansasyna jasalǵan dron shabýylyna qatysty máseleni Ýkraınamen talqylaıtynyn habarlady. 

Artynsha Kaspıı qubyr konsortsıýmynyń azamattyq nysandaryna shabýyl jasaý faktisi boıynsha qylmystyq is qozǵaldy. 

Óz kezeginde Energetıka mınıstrligi Kaspıı qubyr konsortsıýmy arqyly munaı aıdaýda shekteý joq dep málimdedi.