Kaspıı qubyr konsortsıýmy jelisimen munaı tasymaldaý nege toqtatylǵan

ATYRAÝ. KAZINFORM – Kaspıı qubyr konsortsıýmynyń ıeligindegi Teńiz-Novorossıısk munaı qubyrynyń jumysy 12 saǵatqa toqtatyldy. Kompanııanyń baspasóz qyzmeti bul josparlanǵan is-shara ekenin habarlady.

Kaspıı qubyr konsortsıýmynyń Telegram arnasynda búgin taraǵan aqparatqa súıensek, 9 shildede josparlanǵan is-shara kezinde magıstraldyq sharly krandarǵa, energetıkalyq, mehanıkalyq qurylǵylarǵa, baqylaý-ólsheý aspaptary men avtomatıka, baılanys jabdyqtaryna tehnıkalyq qyzmet kórsetý oryndalǵan.

– Mundaı josparly toqtatý turaqty túrde júrgiziledi. Osy kezeńde sorǵy stantsııalary men munaı qubyry jabdyqtarynda toqtatylǵan kezde oryndalatyn jumystar júrgiziledi. Atyraý oblysynda 2 sharly kran aýystyryldy. Taǵy 2-eýine jóndeý júrgizilip, 5-eýiniń germetıkasy tekserildi, - dep habarlady kompanııanyń baspasóz qyzmeti.

Al Reseıdegi Astrahan oblysy men Qalmaqstan Respýblıkasynda tazalaý jáne dıagnostıka quraldaryn iske qosý-qabyldaý torabyndaǵy, 2 drenajdyq sharly krannyń jetegi aýystyryldy. Úsh magıstraldyq sharly krannyń germetıkasy tekserilgen.

Sondaı-aq, Stavropol jáne Krasnodar ólkesindegi jelilik bóliginde úsh jóndeý konstrýktsııasy ornatylǵan. Tyǵyn armatýrasynyń eskirgen úsh elektr jetegi aýystyrylyp, magıstraldyq sharly krandardyń germetıkasyna tekserý júrgizilgen.

– KTK barlyq júk jóneltýshige magıstraldyq munaı qubyrynyń josparly toqtaý merzimin aldyn ala habarlaıdy. Bul aqparatty Qazaqstan Energetıka mınıstrligi Teńiz-Novorossıısk munaı qubyrymen bir jylǵa munaı tasymaldaý kestesin qalyptastyrý kezinde eskeredi. Osylaısha, barlyq qatysýshynyń munaı óndirý jáne KTK qubyrymen tasymaldaý jumysynyń jospary qamtamasyz etiledi, - dep málim etti kompanııanyń baspasóz qyzmetinen.

Eske sala ketelik, budan buryn Qazaqstan men Ázerbaıjan Eýropaǵa munaı jetkizýde basty ról atqaratyny týraly OPEK esebi habarlanǵan bolatyn.