Kaspıı qubyr konsortsıýmy termınalyndaǵy tankerge taǵy dron shabýyl jasady
ASTANA. KAZINFORM — Qazaqstannyń Energetıka mınıstrligi Kaspıı qubyr konsortsıýmynyń (KQK) teńiz termınalynda bolǵan oqıǵaǵa qatysty aqparat taratty.
Vedomstvo málimetinshe, 19 shildeden 20 shildege qaraǵan túni KQK teńiz termınalynda munaı tıeý jumystaryn júrgizip jatqan NELSA tankerine ushqyshsyz ushý apparaty shabýyl jasaǵan.
Shabýyl saldarynan kemede órt shyqqan. Alaıda tótenshe jaǵdaı jedel túrde aýyzdyqtalyp, tolyq sóndirilgen.
Aldyn ala málimet boıynsha, oqıǵa kezinde zardap shekkender joq. Sondaı-aq munaıdyń teńizge tógilýine jol berilmegen.
— Qazirgi ýaqytta kemeniń tehnıkalyq jaı-kúıi men oqıǵanyń saldaryna baǵalaý júrgizilip jatyr, — delingen habarlamada.
Energetıka mınıstrligi Kaspıı qubyr konsortsıýmymen turaqty baılanysta ekenin málimdedi.
Eske salaıyq, buǵan deıin Qazaqstan munaıy tıelgen eki tankerge dron shabýyl jasaǵanyn habarlaǵanbyz.
QR Syrtqy ister mınıstrligi 17 jáne 19 shildede Qara teńiz akvatorııasynda Kaspıı qubyr konsortsıýmynyń (KQK) ınfraqurylymy arqyly munaı tasymaldaǵan azamattyq kemelerge ushqyshsyz ushý apparattarymen jasalǵan shabýyldardy qatań aıyptaǵan edi.
