Kaspıı qubyr konsortsıýmy teńizdegi termınalda munaı tıeýdi toqtatty

Kaspıı qubyr konsortsıýmy (KQK) Qara teńizdegi qolaısyz meteojaǵdaıǵa baılanysty munaı tıeýdi toqtatty. Kazinform bul týraly KQK málimetine silteme jasap habarlaıdy.

«2023 jyldyń qarashasynda Novorossıısk teńiz portynda kún raıyna baılanysty eskertý birneshe ret jarııalandy, KQK ony qatań saqtady.

Eske sala ketsek, KQK Teńiz termınalynda munaıdy tıeý ónerkásip jáne ekologııalyq qaýipsizdik talaptaryn qatań saqtaı otyryp, jaǵalaý syzyǵynan 5 shaqyrym qashyqtyqta ornalasqan sozylyp jetkiziletin aılaq qondyrǵylary (SAQ) arqyly júzege asyrylady.

SAQ konstrýktsııasy qolaısyz kún raıy jaǵdaıynda, munaı quıýdyń dástúrli qurlyq júıeleri operatsııalardy toqtatýǵa májbúr bolǵan kezde munaı tıeýge múmkindik beredi», - delingen málimette.

Qazirgi kezde Novorossıısk aýdanynda óte qolaısyz meteojaǵdaı qalyptasty: jel ekpini 22-24 m/s (79,2-86,4 km/saǵ), tolqyn bıiktigi – 6-8 metr.

Novorossıısk teńiz portynyń kapıtany daýyldy eskertý jarııalady, oǵan sáıkes KQK teńiz termınalynda munaı tıeý toqtatylyp, tankerler kútý oryndaryna jiberildi.

Kompanııanyń rezervýar parkteri is júzinde tolyq. Osyǵan baılanysty jóneltýshilerden munaı tómendetilgen rejımmen qabyldanýda.