Kaspıı qubyr konsortsıýmy «Teńiz» kenishinen 16 mln tonna munaı tasymaldady

ATYRAÝ. KAZINFORM – Kaspıı qubyr konsortsıýmy Atyraý oblysyndaǵy «Teńiz» kenishinen 16 mln tonna munaı tasymaldady.

Kaspıı qubyr konsortsıýmynyń bas dırektory Nıkolaı Gorbannyń málimetinshe, «Teńiz-Novorossıısk» qubyrymen Qazaqstannyń ken oryndarynan jylyna 72,5 mln tonna munaı tasymaldaý múmkindigi qarastyrylyp otyr. Reseı Federatsııasynyń aýmaǵy arqyly ótetin qubyrmen jylyna 83 mln tonna qazaqstandyq kómirsýtekti shıkizatty tasymaldaýǵa daıyndyq jasalǵan.

«Kaspıı qubyr konsortsıýmynyń qubyrymen bıylǵy qańtar-shilde aralyǵynda «Teńiz» ken ornynan shamamen 16 mln tonna munaı tasymaldandy. Kómirsýtekti shıkizat tankerlerge tıelip, tutynýshyǵa jóneltildi», - dep habarlady Nıkolaı Gorban. 

Qazir «Teńiz ken ornynda óndiriletin munaı kólemin arttyratyn eki jobany iske asyrý aıaqtalýǵa taıady. Onyń biri – keleshek keńeıý, ekinshisi – uńǵyma erneýindegi qysymdy basqarý jobasy. Bul jobalar iske qosylǵan kezde ken ornynan Qara teńiz jaǵalaýyndaǵy Novorossıısk aılaǵyna deıin tasymaldanatyn munaı kólemi ulǵaıady.

«Osyǵan oraı Kaspıı qubyr konsortsıýmy aktsıonerlerdiń sheshimine sáıkes teńiz termınalynda, onyń ishinde «Teńiz» ken ornynan munaıdyń ulǵaıtylǵan kólemin qabyldaýdy, tasymaldaýdy jáne jóneltýdi qamtamasyz etý maqsatynda arnaıy baǵdarlama qabyldandy. Konsortsıýmnyń munaı qubyry «Teńiz» munaıyn turaqty qabyldap, qaýipsiz tasymaldaýdy jalǵastyrýǵa tolyq daıyn», - deıdi Nıkolaı Gorban. 

Eske sala ketelik, buǵan deıin Kaspıı qubyr konsortsıýmy aılaǵynda shlang aýystyrý 60 kúnge sozylatynyn habarlaǵan edik.