Kaspıı qubyr konsortsıýmy tankerlerge taǵy dron shabýyldary jasalǵanyn málimdedi
ASTANA. KAZINFORM – Kaspıı qubyr konsortsıýmy 30 shildege qaraǵan túni eki tankerge taǵy shabýyl jasalǵanyn habarlady. Osydan keıin munaı tıeý jumystary ýaqytsha toqtatyldy.
– 2026 jylǵy 30 shildede Máskeý ýaqytymen saǵat 01:48-de Marshall araldarynyń týymen júzetin «NIFFOS SIFNOS» tankerine shabýyl jasaldy. Sol sátte Kaspıı qubyr konsortsıýmynyń VPÝ-3 aılaq qurylǵysynda «Teńizshevroıl» JShS («Chevron» kompanııasy) munaıy tıelip jatqan bolatyn. Ushqyshsyz ushý apparattarynyń shabýyly saldarynan tankerdiń júk palýbasyndaǵy munaı qabyldaý toraby mańynan órt shyqty. Órtti tanker ekıpajy men KQK-nyń úsh qosalqy kemesi sóndirdi, – dep habarlady KQK.
KQK málimetinshe, konsortsıým qyzmetkerleri men merdiger uıymdardyń jumysshylary zardap shekpegen. Munaıdyń tógilýine jol berilmedi. Tanker ekıpajyna medıtsınalyq kómek te, evakýatsııa da qajet bolmaǵan. Keme sý betinde qaldy, qazir onyń qanshalyqty zaqymdanǵany anyqtalyp jatyr. Munaı tıeý jumystary ýaqytsha toqtatylǵanymen, munaı qubyry júıesi qalypty rejımde jumys istep tur.
– Sonymen birge, KQK teńiz termınalynan 6 teńiz mıli qashyqtyqtaǵy aýmaqtyq sýlarda termınalǵa munaı tıeýge bet alǵan Men aralynyń týymen júzetin «MARATHI» tankerine de shabýyl jasaldy, – dep málimdedi konsortsıýmnyń baspasóz qyzmeti.
Eske sala ketsek, 19 shildede Qazaqstan munaıyn tasymaldaıtyn eki tankerge dron shabýyldady.
Sonyń saldarynan munaı tıeý operatsııalary ýaqytsha toqtatyldy.
