Kaspıı qubyr konsortsıýmy tabysty jumys istep tur - Toqaev
Kaspıı qubyr konsortsıýmy tabysty jumys istep tur. Bul týraly Aqordada Reseı Prezıdenti Vladımır Pýtınmen kelissózderden keıingi baspasózge arnalǵan brıfıngte Memleket basshysy Qasym-Jomart Toqaev aıtty, dep habarlaıdy Kazinform.
«Munan bólek biz energetıka salasyndaǵy yntymaqtastyqty, sondaı-aq iri munaı-gaz jobalaryn júzege asyrý barysyn talqyladyq. Reseı gazyn ońtústik baǵytqa jetkizý jobalaryn odan ary damytý, sonymen qatar Qazaqstan arqyly reseılik gazdy Qytaıǵa tasymaldaý kólemin arttyrý mańyzdy sanalady. Bizder Kaspıı qubyr konsortsıýmynyń turaqty jumys isteýin qamtamasyz etý mańyzdylyǵyn atap óttik. Osy oraıda Reseı Federatsııasynyń Prezıdenti Vladımır Pýtınge rızashylyǵymdy bildirdim. Basqasha aıtar bolsaq, KQK tabysty jumys istep tur», - dedi Memleket basshysy.
Qasym-Jomart Toqaev Qazaqstan men Reseı tarapy ózara tıimdi óndiristik kooperatsııanyń keleshegin tyńǵylyqty qarastyrǵanyn atap ótti. Búginde birlesken jobalar pýlynyń 143-ke jetkenin, ınvestıtsııanyń jalpy kólemi 33 mlrd dollardan asyp túsetindigin aıtty.
«Úkimetterge olardy sapaly júzege asyr úshin júıeli jumysty jolǵa qoıý tapsyryldy», - dedi Prezıdent.
