Kaspıı qubyr konsortsıýmy eki qurylǵynyń jumysyn ýaqytsha toqtatty

ASTANA. KAZINFORM – Kaspıı qubyr konsortsıýmy eki aılaq qurylǵysynyń (VPÝ-1 jáne VPÝ-2) jumysyn ýaqytsha toqtatty, dep habarlaıdy kompanııanyń baspasóz qyzmeti.

2025 jyldyń 27 naýryzy men 31 naýryzy aralyǵynda federaldyq memlekettik baqylaý (Rostransnadzor) aıasynda KQK-ge qatysty jospardan tys tekserý júrgizildi. Onyń qorytyndysy boıynsha tekserý aktisi, kemshilikterdi joıý týraly nusqaý, VPÝ-1 jáne VPÝ-2 nysandarynda qyzmetke ýaqytsha tyıym salý týraly hattama toltyryldy.

KQK baspasóz qyzmeti málimetine qaraǵanda, eki qurylǵy jumysy toqtap turǵan kezeńde teńiz termınalynda munaı ótkizý úshinshi aılaqta (VPÝ-3) jalǵasady.

Bul turǵyda KQK aktsıonerleri atalǵan qadaǵalaý organynyń nusqaýlary týraly habardar etilgen.

Kompanııanyń habarlaýynsha, Reseı Federatsııasy Úkimetiniń tapsyrmasy boıynsha 2025 jyldyń 26 naýryzynan bastap kólik salasynda qadaǵalaýdyń federaldy qyzmeti sý kóligi ınfraqurylymy nysandarynyń qaýipsizdigine tekserý júrgizip jatyr. Osy oraıda birqatar porttaǵy uıymdar tekserýmen qamtylǵan.

- Tekserýler 2024 jylǵy 15 jeltoqsanda Kerch buǵazynda tankerlerdiń apatqa ushyraýy saldarynan munaıdyń tógilýinen týyndaǵan tótenshe jaǵdaıǵa baılanysty uıymdastyryldy, - delingen kompanııa aqparatynda.

24 naýryzda Kaspıı qubyry konsortsıýmyna dron shabýylynan keıin munaı aıdaý stantsııasyn qalpyna keltirip jatqany týraly habarlaǵan edik.