Kaspıı qubyr konsortsıýmy arqyly munaı aıdaýda shekteý joq – Energetıka mınıstrligi

ASTANA. KAZINFORM – Qazaqstan munaıy Kaspıı qubyr konsortsıýmy jelisi arqyly kedergisiz jóneltilip jatyr. Bul jaıynda elimizdiń Energetıka mınıstrliginen málim etti.

- Qazirgi ýaqytta Kaspıı qubyr konsortsıýmy tarapynan Qazaqstan munaıyna shekteý joq. Qabyldaý keste boıynsha júzege asyrylyp jatyr. KQK aqparatyna sáıkes, «Teńiz-Novorossıısk» magıstraldy munaı qubyry 2025 jyldyń 17 aqpany kúni Máskeý ýaqytymen saǵat 02:50-de «Kropotkınskaıa» munaı aıdaý stansasynyń qatysýynsyz tranzıttik rejımde iske qosyldy, - dep atap ótedi vedomstvodan.

Keshe Kaspıı qubyr konsortsıýmynyń «Kropotkınskaıa» munaı aıdaý stansasyna ushqyshsyz ushatyn apparatpen shabýyl jasaldy.

Osydan keıin elimizdiń Energetıka mınıstrligi Qazaqstan munaıy úshin KQK tarapynan esh shekteý joqtyǵyn, munaıdy qabyldaý shtattyq rejımde júzege asyrylyp jatqanyn málimdegen edi.

Alaıda, reseılik «Transneft» kompanııasynyń resmı saıtynda búgin jarııalanǵan aqparatta Qazaqstan tarapynan munaı aıdaý kóleminiń qysqarýy múmkin ekendigi aıtylady.

Búgin Reseı Tergeý komıteti Kaspıı qubyr konsortsıýmynyń azamattyq nysandaryna jasalǵan shabýyl faktisi boıynsha qylmystyq is qozǵaǵany belgili boldy.