Kaspıı Qubyr Konsortsıýmy arqyly munaı aıdaý kólemi 81,5 mln tonnaǵa deıin artady
ASTANA. KAZINFORM — QR Premer-mınıstri Oljas Bektenov pen Kaspıı qubyr konsortsıýmynyń bas dırektory Nıkolaı Gorban munaı tasymaly salasyndaǵy áriptestik máseleleri boıynsha kezdesý ótkizdi, dep habarlaıdy Úkimettiń baspasóz qyzmeti.
Onda qazir júzege asyp jatqan jáne perspektıvaly ınvestıtsııalyq baǵdarlamalardyń oryndalý barysy jáne «Teńiz-Novorossıısk» munaı qubyryn jańǵyrtý qarqyny qaraldy.
Halyqaralyq konsortsıým basshysy 2024 jyldyń qorytyndysy týraly aqparat berdi.
Nıkolaı Gorban «Kropotkınskaıa» munaı aıdaý stansasynda qalpyna keltirý jumystarynyń aıaqtalǵany jáne iske qosylǵany týraly baıandady. «QazTransOıl» AQ men KQK áriptestigi aıasynda 2024 jyly KQK munaı qubyry jelisi men «QazTransOıl» AQ-nyń T.Qasymov atyndaǵy munaı aıdaý stansasyn baılanystyratyn jańa qubyr qurylysy jáne ony iske qosý jobasy júzege asyryldy.
— Búginde aıdaý kólemin jylyna 67 mln tonnadan 81,5 mln tonnaǵa deıin, onyń ishinde qazaqstandyq ýchaske boıynsha jylyna 53,7 mln tonnadan 72,5 mln tonnaǵa deıin arttyrýǵa tehnıkalyq múmkindik qamtamasyz etildi. KQK munaı qubyrynyń «tar» tustaryn joıý jobasyn iske asyrý nátıjesinde bıylǵy qazan aıynda munaı jóneltý kólemin 1 mlrd tonnaǵa deıin jetkizý josparlanyp otyr, — delingen habarlamada.
Oljas Bektenov Úkimet KQK munaı qubyrynyń úzdiksiz jumys isteýi máselesine erekshe nazar aýdaryp otyrǵanyn basa aıtty. Júıe qazaqstandyq munaı eksporty boıynsha mańyzdy arterııa sanalady. Osyǵan baılanysty qazaqstandyq tarap qajetti qoldaý kórsetedi.
Kezdesý barysynda konsortsıýmnyń áleýmettik jaýapkershiliginiń mańyzdylyǵy atap ótildi. KQK Qazaqstanda birqatar áleýmettik jobany iske asyrýda, onyń ishinde Atyraý qalasynda 900 oryndyq mektep salyp jatyr. Ótken jyly áleýmettik jobalarǵa barlyǵy 4,4 mlrd teńge bólindi. 2025 jyly bilim berý jáne medıtsınalyq ınfraqurylymdy damytýǵa yqpal etetin sharalar josparlanyp otyr.
Kelissózder qorytyndysy boıynsha taraptar ózara is-qımyl baǵyttary boıynsha yntymaqtastyqty nyǵaıtý nıetterin jetkizdi.
Osyǵan deıin Oljas Bektenov Almatynyń elektrondy kommertsııa ınfraqurylymymen tanysqanyn jazǵanbyz.