Kaspıı kóliniń problemasyn zertteıtin ınstıtýt qurylady

ASTANA. QazAqparat – Ekologııa jáne tabıǵı resýrstar mınıstrligi Ekologııalyq retteý jáne baqylaý komıteti tóraǵasynyń mindetin atqarýshy Aıdar Abdýalıev Kaspıı kóliniń tartylýyna qatysty túsinik berdi, dep habarlaıdy QazAqparat tilshisi.

«Jelide Kaspııdiń tartylyp bara jatqany týraly vıdeolar shyǵyp jatyr. Munyń sebebi ne jáne Kaspıı Araldyń taǵdyryn qaıtalaıdy dep oılamaısyz ba?», - dep surady BAQ ókili Ortalyq kommýnıkatsııalar qyzmetinde ótken brıfıngide.

Aıdar Abdýalıev Kaspııdiń deńgeıi jyldar tizbeginde qubylyp kelgenin aıtty.

«Keıingi 120 jylda onyń deńgeıi Baltyq júıesimen alǵanda -25 metrden -29 metrge deıin qubylǵan. Qazirgi deńgeıi -28,6 metr. Bir jyldary budan tómen kezderi bolǵan. 1978 jyldan beri kól deńgeıi kóterildi de, 2006 jyldan bastap qaıta tústi. ıAǵnı, kezeń-kezeńmen qubylyp tur. Bul problema joq degen sóz emes. Klımattan bólek, Edilden keletin sýdyń azaıýy bar», - dedi ol.

Vedomstvo ókili Kaspıı sýynyń 95 paıyzdaıy Edil ózeninen keletinin eske saldy.

«Jaıyqtyń sýy da azaıyp ketti. Sonda Kaspııdiń tartylýyna negiz bolatyn faktorlar barshylyq. Biraq jańa da aıtqanymdaı, munyń maýsymdyq sıpaty bolýy da múmkin. Sol úshin Kaspıı kóliniń problemalaryn zertteıtin ınstıtýt qurylady. Sol ınstıtýt problemany sheshýdiń joldaryn kól jaǵasyndaǵy eldermen birlesip pysyqtaıdy», - dedi Aıdar Abdýalıev.