«Kaspıı» klýbynyń fýtbol ortalyǵy ashyldy (FOTO)
ASTANA. QazAqparat - Búgin Qazaqstan fýtbol federatsııasynyń prezıdenti Erlan Qojaǵapanov Mańǵystaý oblysyna jumys saparymen baryp, «Kaspıı» klýbynyń fýtbol ortalyǵynyń ashylý rásimine qatysty. Ashylý rásim 2012-2022 jyldary Qazaqstan Respýblıkasynda balalar men jasóspirimder fýtbolyn damytý baǵdarlamasyn júzege asyrý aıasynda ótti, dep habarlady federatsııanyń baspasóz qyzmetinen.
Klýb jyl saıyn fýtbol ortalyǵyna 109 mıllıon teńge bóledi. Bul qarjyǵa sporttyq jabdyqtar, ortalyqtyń tárbıelenýshileri men jattyqtyrýshylarynyń sporttyq kıimderi alynady. Sonymen qatar, jattyqtyrýshylardyń jalaqysy men jasóspirimder komandalardyń issaparlarynyń shyǵyny tólenedi.
«Kaspıı» fýtbol klýbynyń fýtbol ortalyǵynda qazirgi ýaqytta 14 top bar. Onda 300-ge tarta bala fýtbolmen shuǵyldanady.
«Elbasy 2020 jylǵa qaraı sportpen shuǵyldanatyn qazaqstandyqtardyń sanyn 30 paıyzǵa jetkizý mindetin alǵa qoıdy. Fýtbol ortalyǵynda tábıelenetin balalardyń sany aıtarlyqtaı ósedi. Ortalyqtyń basty mindeti - fýtbolshylardy daıyndaý. Olar oblys komandasynyń jáne ulttyq quramanyń namysyn qorǵaýy tıis. Fýtbol ortalyǵy Qazaqstan Respýblıkasy Tuńǵysh Prezıdenti kúnin merekeleý kúnderi ashyldy. Sondyqtan bul ortalyqtyń saltanatty ashylý rásimi Elbasynyń Aqtaý balalaryna arnaǵan syıy dep aıtýǵa bolady», - deıdi QFF prezıdenti Erlan Qojaǵapanov.
Aıta ketý kerek, qazirgi tańda Qazaqstannyń barlyq aımaǵynda 16 fýtbol ortalyǵy jumys istep tur. Taǵy bir fýtbol ortalyǵy aldaǵy ýaqytta Petropavl qalasynda ashylady.
