Kaspıı qaırańynda munaı óndirýmen aınalysatyn kásiporyndaǵy qaýipsizdiktiń buzylýyna oraı 56 tulǵa jaýapkershilikke tartyldy - V. Bojko
ASTANA. 15 qarasha. QazAqparat /Qanat Mámetqazyuly/ - Kaspıı qaırańyn ıgerip jatqan munaı óndirýmen aınalysatyn kásiporyndaǵy qaýipsizdiktiń buzylýyna oraı 56 tulǵa jaýapkershilikke tartyldy.
Bul týraly búgin QR Parlamenti Májilisindegi Úkimet saǵatynda Tótenshe jaǵdaılar mınıstri Vladımır Bojko aıtty.
«Kaspıı teńiziniń qazaqstandyq sektorynda munaı operatsııalarynyń qarqyndy júrgizilýine, sondaı-aq Meksıka buǵaýyndaǵy burǵylaý platformalarynyń jarylýyna uqsas apattarǵa jol bermeý maqsatynda teńizdegi munaı operatsııalaryna memlekettik baqylaý qatańdatylyp keledi. Osy baǵytta normatıvtik-quqyqtyq jetildirýge arnalǵan belsendi uıymdastyrý-praktıkalyq sharalary qabyldanýda. Máselen, munaı tógilýin qadaǵalaý jónindegi Ulttyq komıssııanyń otyrysy men «Munaı» komandalyq-shtabtyq oqý jattyǵýy ótkizildi. Onda barysynda Kaspıı teńiziniń sý aıdyndarynda munaı tógilýine baılanysty áreket etetin kúshter men quraldardyń is-qımyly pysyqtaldy», - dedi mınıstr.
Onyń aıtýynsha, atalǵan baǵytta 2010 jyldyń 10 aıynda Kaspıı teńiziniń shelfinde munaı óndirýmen aınalysatyn 34 kásiporyndaǵy 273 nysan tekserilgen. 617 ónerkásiptik qaýipsizdik talaptarynyń buzýshylyǵy anyqtalyp, 56 laýazymdy tulǵa jaýapkershilikke tartylǵan. «Jalpy, Kaspıı teńizinde munaı operatsııalaryn júrgizý kezinde apattar men oqys oqıǵalarǵa jol berilgen joq», dedi V. Bojko.
