Kaspıı ıtbalyqtaryn qorǵaý úshin qandaı sharalar qolǵa alynǵan

AQTAÝ. QazAqparat - Teńiz akvatorııasynda ıtbalyqtardy qorǵaýǵa arnalǵan sharalar jaıynda Mańǵystaý oblysy tabıǵı resýrstar jáne tabıǵat paıdalanýdy retteý basqarmasynyń bólim basshysy Dınara Eńsegen qoǵamdyq kommýnıkatsııa ortalyǵynda ótken brıfıngte aıtyp berdi.

Spıkerdiń aıtýynsha, Kaspıı ıtbalyǵy popýlıatsııasy sanynyń dınamıkasyn zertteý, qaýip faktorlaryn keshendi baǵalaý jáne olardy azaıtý boıynsha usynys ázirleý maqsatynda 2009 jyldan beri Kaspıı teńizindegi araldarǵa ekspedıtsııa uıymdastyrylyp keledi.

- Kaspıı problemalary ǵylymı-zertteý ınstıtýty Aqtaý fılalynyń keshendi baǵdarlamasyn jasaqtaý úshin oblystyq bıýdjetten 40 mln teńge bólindi. «Astana» halyqaralyq ǵylymı kesheni «Mańǵystaý oblysy boıynsha ekologııalyq jaǵdaıdy jaqsartýdyń 2026 jylǵa deıingi merzimdi qamtıtyn baǵdarlamasyn» jasap bitti. Baǵdarlamadaǵy 27 ǵylymı-qoldanbaly zertteý jobasyn iske asyrý úshin tıisti organdarǵa jiberildi,-dedi Dınara Eńsegen.

Spıkerdiń málimetinshe, 2019 jyly 6 tamyzda Aqtaý qalasynda Kaspıı ıtbalyǵyn zertteý jáne ońaltý ortalyǵy ashyldy.

Ortalyqta jaralanǵan nemese jaǵalaýda jalǵyz júrgen ıtbalyqtar zerttelip, qorektendirilip, emdelip, ómir súrý ortasyna jiberilip otyrady.

Sondaı-aq, 2021 jyly Mańǵystaý oblysynyń ekologııalyq máselelerin keshendi sheshý boıynsha jol kartasy jasalǵan.

Jol kartasynyń 33-tarmaǵynda Kaspıı ıtbalyqtarynyń Kendirli shyǵanaǵyndaǵy araldardy, Komsomolskıı shyǵanaǵyndaǵy araldardy jáne Prorva teńiz ýchaskesiniń aýdanyn jóndeý shalyqtaryn saqtaý jáne qalpyna keltirý úshin respýblıkalyq mańyzy bar erekshe qorǵalatyn tabıǵı aýmaqtar jelisin qurýdyń tabıǵı-ǵylymı negizdemesin ázirleý boıynsha ǵylymı-zertteý jumysyn júrgizý qarastyrylǵan.

Atalǵan shara nátıjesinde respýblıkalyq mańyzy bar memlekettik tabıǵı úsh rezervat: «Dýrneva Araldary» (Komsomol shyǵanaǵynda), «Itbalyqtar araly» jáne «Kendirli shyǵanaǵyndaǵy araldar» qurylady.

Qazirgi tańda mınıstrlik jumysty jalǵastyryp jatyr.