Kaspıı ıtbalyǵynyń popýlıatsııasyn qalpyna keltirýde nátıje baıqalmaı tur - senator
Depýtat 2030 jylǵa deıin eseptelgen salalyq baǵdarlamaǵa sáıkes balyqty ishki tutyný deńgeıin 134 myń tonnaǵa ulǵaıtý, al ımport kólemin 25 myń tonnaǵa deıin azaıtý jumystary josparlanyp otyrǵanyn atap ótti.
«Tabıǵı sý aıdyndarymen qosa, akvaósirýdiń qarqyndy damýyna qaramastan, baǵdarlamada kózdelgen nysanaly kórsetkishterdi oryndaýda kóptegen kemshilik bar. Sý bıologııalyq resýrstaryn saqtaýda, Kaspıı ıtbalyǵynyń popýlıatsııasyn qalpyna keltirýde naqty nátıje baıqalmaı otyr. Sonymen qatar, brakonerlikpen kúres, balyq resýrstaryn qorǵaý salasyndaǵy memlekettik baqylaý men qadaǵalaý deńgeıi tómen», - dedi senator.
Senator balyq sharýashylyǵy salasynyń damýy eldiń azyq-túlik qaýipsizdigine tikeleı áser etetinin atap ótti. Ol óz saýalynda saladaǵy máselelerdi sheshýdiń birqatar keshendi joldaryn usyndy. Depýtat sý resýrstarynyń tapshylyǵy bolýynyń yqtımaldyǵyn eskere otyryp, balyq sharýashylyǵyn damytýdyń 2021-2030 jyldarǵa arnalǵan baǵdarlamasyna jekelegen túzetýler engizýdi usyndy.
Dúısenǵazy Mýsın tereń óńdelgen balyq ónimderin ilgeriletý jáne sýbsıdııalaý jumystarymen belsendi túrde aınalysýdy mańyzdy dep sanaıdy. Memlekettegi balyq ósirý sharýashylyqtaryn qaıta qurý jáne sala qyzmetkerleriniń jalaqysyn ósirý týraly máseleni qaraý qajet ekenin, oǵan qosa aýmaqtyq balyq qorǵaý organdaryn zamanaýı jabdyqtarmen jaraqtandyrýǵa erekshe nazar aýdarý kerek ekenin de aıtty.
«Kaspıı ıtbalyǵynyń popýlıatsııasyn saqtaý maqsatynda erekshe qorǵalatyn tabıǵı aýmaq qurylýy – keleshekte, memleketaralyq kelisimder negizinde, transshekaralyq qoryq qurýǵa negiz bolady dep bilemiz. «Akvaósirý týraly» zań jobasynyń qabyldanýynyń jedeldetilýi, sonymen qatar, balyq sharýashylyǵynyń zańnamalyq bazasyn jetildirý maqsatynda Sý jáne Jer kodeksterine jáne basqa da zańdarǵa túzetýler engizý - salanyń damýyna jańa serpin bereri sózsiz», - dedi depýtat.
Foto: krasivosti.pro
