Kaspıı ıtbalyqtarynyń sany mıllıonnan 270 myńǵa deıin azaıǵan — Toqaev
ASTANA. KAZINFORM — Memleket basshysy Qasym-Jomart Toqaev alǵashqy Kaspıı ekologııa sammıtinde teńizdiń tartylýy men bıoalýantúrliliktiń azaıýyna alańdaýshylyq bildirdi. Prezıdenttiń aıtýynsha, 2000–2025 jyldary Kaspııdiń sý aıdyny 16 myń sharshy shaqyrymnan astam aýmaqqa qysqarǵan, al ıtbalyqtar sany sońǵy ǵasyrda mıllıonnan 270 myńǵa deıin azaıǵan. Bul týraly Aqorda málim etti.
Qasym-Jomart Toqaev alǵashqy Kaspıı ekologııa sammıtin ótkizý týraly ózekti bastamany der kezinde kótergen Túrikmenstan Prezıdenti Serdar Berdimuhamedovke rızashylyǵyn jetkizdi.
Memleket basshysy Kaspıı teńiziniń aımaq halqy úshin strategııalyq mańyzy zor ekenine toqtalyp, búgingi kezdesýdiń tarıhı sıpatyn atap ótti.
— Kaspıı — biregeı tabıǵı qazyna, mıllıondaǵan adamnyń tirshilik kózi, kúlli Eýrazııa qurlyǵyndaǵy negizgi kólik jáne energetıka toraby. Sondyqtan teńiz ekojúıesin saqtaýǵa, eń aldymen, bizdiń memleketterimiz múddeli bolýy kerek. Osy oraıda, muny tek ekologııalyq daǵdarys emes, saldary óte qaýipti ekonomıkalyq ahýal dep baǵalaǵan Iran Prezıdenti Masýd Pezeshkıan myrzanyń pikirin quptaımyn. Eger qazir jedel ári batyl sharalar qabyldanbasa, ekologııalyq jaǵdaı kúrt nasharlaýy yqtımal. Bul Kaspıı mańynda ornalasqan elderdiń halqyna ǵana emes, álemdik qoǵamdastyqqa da zardabyn tıgizedi. 2000 jyldan 2025 jylǵa deıin tartylǵan teńiz aýmaǵy 16 myń sharshy shaqyrymnan asty. Jekelegen ýchaskelerde sý jaǵadan ondaǵan shaqyrymǵa deıin alystap ketken. Kaspııge kelip quıatyn ózen sýynyń azaıýy, klımattyń jylynýy, antropogendik júktemeniń artýy názik tabıǵı júıe men teńizdiń bıoalýantúrliligine óte jaǵymsyz áser etip, orasan nuqsan keltiredi. Kaspıı ıtbalyqtarynyń ahýaly qatty alańdatady. Sońǵy ǵasyrda olardyń sany 1 mıllıonnan 270 myńǵa deıin azaıdy, — dedi Memleket basshysy.
