Kaspıı halyqaralyq tranzıttik júk ortalyǵyna aınalyp keledi

ASTANA. QazAqparat - 24-25 qarashada «Qazaqstan temir joly» UK» AQ delegatsııasy Bakýdegi «Kaspıı aımaǵy: Strategııalyq seriktestik» temirjol bıznes forýmyna qatysty, dep habarlaıdy kompanııanyń baspasóz qyzmeti.

«QTJ» UK» AQ vıtse-prezıdenti Sanjar Elýbaev «Álemniń tórt tarabyn jalǵaǵan Kaspıı tranzıti» baıandamasynda «Eýrazııa qurlyǵyndaǵy iri naryqtaǵy halyqaralyq saýdany transulttyq tasymaldaýdyń eń qolaıly jáne ońtaıly qazirgi zamanǵy úlgisimen qamtý basym baǵyttardyń birinen sanalady. Osyǵan oraı Kaspıı teńizi Shyǵys-Batys, Soltústik-Ońtústik baǵdarlaryndaǵy halyqaralyq kólik dálizderin baılanystyrýda transqurlyqtyq zor mańyzǵa ıe», - dedi.

Kompanııa vıtse-prezıdenti Kaspıı jaǵalaýy ınfraqurylymyn jáne flotyn damytý, Kaspıı dálizindegi barlyq baǵdarǵa qatysýshylardyń seriktestigin ınstıtýtsıonaldyq turǵydaǵy jetildirý sharalary týraly baıandady. Onyń ishinde, Transkaspıı kólik baǵdaryn damytý jónindegi Úılestirý komıteti qurylǵaly beri qatysýshylar arasyndaǵy ózara tehnologııalardy bekitý, ótpeli tarıftik stavkalardy jáne biryńǵaı baǵa saıasatyn kelisý, sonymen qatar Nomad Express konteınerlik poıyzyna qyzmet kórsetý men uıymdastyrý jumystary atqaryldy.

«Búgingi tańda biz Qytaıdan Túrkııa, Eýroodaq elderine Transkaspıı baǵdarymen konteınerlik poıyzdardy 12-16 táýlikte jetkizýdiń keshendi qyzmetin atqara alamyz», - dep habarlady S. Elýbaev.

Ol memleketaralyq kelisim bazasynyń jasaqtalýyna tapsyrys berýshilerdi qyzyqtyratyn tarıftik jeńildikter usyný jaıyna toqtaldy.