«Kaspıı» fýtbol klýbynyń burynǵy dırektory 5 jylǵa sottaldy
AQTAÝ. QazAqparat - Aqtaý qalasynyń №1 soty «Kaspıı» fýtbol klýbynyń burynǵy dırektory Mels Kýshanovqa qatysty sot úkimin shyǵardy, dep habarlaıdy «QazAqparat» HAA tilshisi.
Aıyptalýshy 3 mln 133 myń teńge kóleminde keltirilgen shyǵyndy óz erkimen ótese de, sot ony 5 jylǵa bas bostandyǵynan aıyrý úkimin shyǵardy. Aıyptalýshyǵa QR QK 189 bap 3 jáne 1,2 tarmaqtarynda qarastyrylǵan «Qyzmettik jaǵdaıyn paıdalana otyryp, senip tapsyrylǵan bireýdiń múlkin ıemdený nemese jumsaý» jáne QR QK 365 bap, 2 taraý, 2 tarmaǵynda qarastyrylǵan «Zańdy kásipkerlik qyzmetke kedergi jasaý» boıynsha aıyp taǵyldy.
Mels Kýshanov memleket qarajatyn jymqyrǵany úshin aıyptalyp otyr. Ol oıynshylarǵa jalǵan issapar qujattaryn rásimdep, kıim-keshekter men sporttyq jabdyqtar aldyrǵan. Taǵy bir is tendermen baılanysty. Jabdyqtardy jetkizý baıqaýyn 7 mln 671 myń teńgege (kelisimsharttyń jalpy somasy) «Aqtaý Batys» kompanııasy jeńip alǵan. M.Kýshanov kelisimdi buzyp, «Kaspıı» fýtbol klýbynyń burynǵy oıynshysy basqaratyn «Treıd Kompanı» JShS-men kelisim jasasqan.
«Kýshanov óz kinásin tolyqtaı moınyna aldy, keltirilgen shyǵyndy ótedi, isti tyńdaýdy qysqartylǵan tártippen ótkizýdi ótindi jáne oǵan ómir boıy memlekettik qyzmetti atqarýǵy tyıym salynyp, qylmystyq jolmen alynǵan múlikterin tárkileı otyryp, 5 jylǵa bas bostandyǵynan aıyrý jazasyna kesildi», - dedi Aqtaý qalalyq №1 sotynyń iske tóraǵalyq etýshi tóreshisi Málik Kenjalıev.
