Kaspıı bankten dep habarlasqan alaıaq elordalyqty bopsalady
NUR-SULTAN. QazAqparat – Elorda turǵyny Malıka Dúısenbaeva Facebook paraqshasyna telefon alaıaǵyn áshkerelegen vıdeony jarııa etti, dep habarlaıdy QazAqparat.
«Alaıaqtar meniń búkil otbasymdy baýyzdap tastaımyn dep qorqytty. Ózderi Kaspıı bankten habarlasqandaı qońyraý shaldy. Kaspııden kelgen kilt sózdi aıtýymdy talap etti. Men bul qońyraýdy banktyń call-ortalyǵy arqyly tekserip almaq boldym. Osy áreketimmen olardy ashýlandyryp alsam kerek – meni qorqytyp, balalarymmen birge óltiretinderin aıtyp, qoqan-loqy jasady. Qysqasy, búkil áńgimeni vıdeoǵa jazyp aldym», - dedi Malıka Dúısenbaeva jelide vıdeomen birge salǵan habarlamasynda.
Áıeldiń aıtýyna qaraǵanda, alaıaqtarmen sóıleskennen keıin álgilerdiń nómirinie qaıtara qońyraý shalǵan. Alaıda basqa bireý qońyraýdy kóterip, ol alaıaqqa múlde qatysy joqtyǵyn, osyndaı qońyraýmen tórtinshi adam habarlasyp turǵanyn alǵa tartqan.
«Olar men týraly bárin biledi. Ne isterimdi bilmeımin. Qorqynyshty eken», - dedi Malıka Dúısenova.
Óz kezeginde Kaspıı bank te bul oqıǵaǵa qatysty pikir bildirdi.
«Bizdiń klıentke alaıaqtyqtyń mundaı faktisimen betpe-bet kelgenine ókinish bildiremiz. Kaspıı bank qyzmetkerleri kartanyń fotosyn, sondaı-aq, SMS boıynsha rastalatyn karta boıynsha málimetterdi eshqashan suramaıdy. Bul alaıaqtyq deıdi», - dedi Kaspıı bankten.
