Kaspıı, Aral jáne Balqash basseınderinde pılottyq sý jobalary ázirlenýi múmkin
ASTANA. KAZINFORM — Kaspıı jáne Aral teńizderi basseınderinde, sondaı-aq Balqash-Alakól basseıninde topyraqtaǵy ylǵaldy saqtaý jáne jaýyn-shashyn sýlaryn ustap qalý boıynsha pılottyq jobalardy ázirleý sharalary usynyldy.
Sý resýrstary jáne ırrıgatsııa mınıstri Nurjan Nurjigitov sý resýrstaryn basqarý salasyndaǵy halyqaralyq jáne qazaqstandyq sarapshylarmen kezdesti.
Jıynǵa halyqaralyq Water Holistic baǵdarlamasynyń negizin qalaýshy, «Jańa sý paradıgmasy» tujyrymdamasynyń avtory ári qorshaǵan ortany qorǵaý salasyndaǵy bedeldi Goldman syılyǵynyń laýreaty doktor Mıhal Kravchık, L. N. Gýmılev atyndaǵy Eýrazııa ulttyq ýnıversıtetiniń professory, geografııa ǵylymdarynyń doktory Marat Ishanqulov, Ortalyq Azııanyń sý resýrstaryn basqarý jáne klımattyń ózgerýi jónindegi saraptamalyq platformasynyń úılestirýshisi doktor Býlat Esekın jáne EcoMind ekojúıelik sheshimder ortalyǵynyń dırektory doktor Arman Ótepov qatysty.
Kezdesý barysynda taraptar Qazaqstan men Ortalyq Azııanyń sý jáne klımattyq qaýipsizdigin qamtamasyz etýge baǵyttalǵan praktıkalyq usynystardy iske asyrý máselelerin talqylady. Bul usynystar Astanada ótken Óńirlik ekologııalyq sammıt aıasynda BUU Damý baǵdarlamasy uıymdastyrǵan semınar qorytyndysy boıynsha ázirlengen.
Usynystardyń qatarynda Qazaqstandaǵy shaǵyn sý aınalymdaryn júıeli túrde qalpyna keltirýge baǵyttalǵan «Jańa sý paradıgmasy» tujyrymdamasyn praktıkalyq turǵyda júzege asyrý úshin Sý resýrstary jáne ırrıgatsııa mınıstrligi janynan arnaıy jumys tobyn qurý kózdelgen. Budan bólek, Kaspıı jáne Aral teńizderi basseınderinde, sondaı-aq Balqash-Alakól basseıninde topyraqtaǵy ylǵaldy saqtaý jáne jaýyn-shashyn sýlaryn ustap qalý boıynsha pılottyq jobalardy ázirleý sharalary usynyldy.
— Qazaqstannyń sý qaýipsizdigin qamtamasyz etý salasynda ǵylymı qaýymdastyqpen ózara is-qımyl jasaý biz úshin óte mańyzdy. Biz árdaıym yntymaqtastyqqa ashyqpyz jáne Ortalyq Azııanyń sý resýrstaryn saqtaýǵa, sondaı-aq klımattyń ózgerýine beıimdelýge baǵyttalǵan otandyq jáne halyqaralyq sarapshylar usynǵan bastamalardy muqııat zerdeleımiz, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik Túrkistandyq fermerler qaýynnyń búlinýin jasandy jańbyrdan kórip otyrǵany týraly jazǵan edik.
