Kaspi, Kazakhmys jáne KAZ Minerals aktsıonerleri men basshylary SQO-daǵy turǵyn úılerdi qalpyna keltirýge 60 mlrd teńgege deıin bóledi – Qanat Bozymbaev
ASTANA. KAZINFORM - Soltústik Qazaqstan oblysyna Premer-Mınıstrdiń orynbasary Qanat Bozymbaev, «Kazakhmys Holding» JShS dırektorlar keńesiniń tóraǵasy Edýard Ogaı, Kaspi.kz dırektorlar keńesiniń tóraǵasy Vıacheslav Kım, sondaı-aq «KAZ Minerals Management» JShS basqarma tóraǵasy Eldar Mamedov bolyp, qalpyna keltirý jumystarynyń barysymen tanysty. Sonymen qatar jergilikti turǵyndarmen kezdesti.
Sý tasqyny bastalǵaly oblysta 3898 úıdi sý basqan. Saıajaı aýmaǵy aıtarlyqtaı zardap shekti – 6597 ýchaske. Oblys ákimdiginiń málimetinshe, sý basqan turǵyn úılerdiń 40 paıyzynyń odan ári turýǵa jaramsyz bolýy múmkin.
Úısiz qalǵandar ýaqytsha jataqhanaǵa ornalastyryldy. Vıtse-premer olarǵa memleket tarapynan qarjylyq qoldaý sharalaryn eske saldy. Qazirdiń ózinde 3383 otbasy 100 AEK kóleminde bir rettik járdemaqy aldy. 1600-den astam otbasyna 600 mıllıon teńge qosymsha tólem qarastyrylǵan.
Sondaı-aq oblys turǵyndaryna KAZ Minerals, Kazakhmys Holding jáne Kaspi.kz atty úsh iri kompanııa Qazaqstanda sý tasqynynan zardap shekkender, negizinen SQO úshin 60 mıllıard teńgege deıin bóletini týraly habarlandy.
«Memleket basshysynyń tapsyrmasy boıynsha men úsh iri kompanııanyń aktsıonerlerimen jáne basshylyǵymen birge sizdiń óńirge keldim. Jalpy somasy 60 mlrd teńge sý tasqynynan zardap shekkenderge páter satyp alýǵa jáne úı salýǵa baǵyttalady», - dedi Premer-Mınıstrdiń orynbasary halyqpen kezdesýinde.
Oblys ákimdigine eki apta ishinde turǵyn úılerdi baǵalap, ony qalpyna keltirýdi bastaýdy tapsyrdy.
«Mundaı jaǵdaı bizdiń elde birinshi ret bolyp otyr. Bul naǵyz apat ekenin óz kózimmen kórdim. Eshkim beıjaı qalmaýy kerek. Munda bári teń. Úkimetpen birge qoldan kelgenniń bárin jasaýǵa tyrysamyz», - dedi Kaspi.kz dırektorlar keńesiniń tóraǵasy Vıacheslav Kım.
Solnechnoe-2 aýylynda bir tıpti 100 úıdiń qurylysy bastalyp ta ketti. 10 merdigerlik uıym jumyldyryldy. Joba oblys ákimdigi men «Qazaqstan halqyna» qory arasynda qol qoıylǵan memorandým aıasynda bastaldy. Baspanany jazdyń ortasyna deıin aıaqtaýǵa múmkindik beretin qajetti ınjenerlik ınfraqurylym men kommýnıkatsııalar bar.
Budan keıin Qanat Bozymbaev Indýstrııa jáne qurylys mınıstri Qanat Sharlapaev pen merdigerlerdiń qatysýymen keńes ótkizdi.
«Indýstrııa jáne qurylys mınıstrine oblysty qajetti qurylys materıaldarymen qamtamasyz etýdi, qurylys materıaldarynyń baǵasyn únemi qadaǵalap, onyń qymbattaýyna jol bermeýdi tapsyramyn. Ár tıynǵa suranys bolatynyn merdigerler men ákimdikke taǵy da eske salamyn. Óńirlerdi qalpyna keltirý úderisine quqyq qorǵaý organdary jumyldyrylyp, jaǵdaıdy muqııat qadaǵalap otyr. Aýa raıy salqyndaǵansha zardap shekkenderdiń barlyǵyn qonystandyrýymyz kerek», - dep túıindedi sózin Premer-Mınıstrdiń orynbasary.