Kaspi-de halyqtan jylý jınaý úshin 358 qor tirkelgen – Aıgúl Orynbek

BÝRABAI. KAZINFORM – Belgili zańger Aıgúl Orynbek Býrabaıda ótip jatqan Ulttyq quryltaıdyń IV otyrysynda qaıyrymdylyq qorlarynyń jaýapkershiligin kúsheıtý úshin zańǵa tıisti ózgertýler engizýdi usyndy.

− Qazirgi tańda memleketimizde túrli qaıyrymdylyq qorlary kóbeıip ketti. Qaıda barsań da, aqsha jınap júrgen qorlar men olardyń el tanymaıtyn músheleri men basshylaryn kóresiń. Ókinishke qaraı, qaıyrymdylyq qorlarynyń atyn jamylǵandardyń barlyǵy adal jolmen júrip, shynaıy maqsattarǵa qyzmet etip jatyr dep aıta almaımyn. Osy rette taǵy myna bir kúdikti jaıtqa toqtalǵym keledi. Mysaly jaı ǵana Kaspi qosymshasynda 358 qaıyrymdylyq qory halyqtan elektrondy túrde jylý jınaý úshin tirkelgen. Tańdanatynymyz sol, bul qorlardyń keıbiri qandaı maqsatta, ne úshin qurylǵany belgisiz. Basshylary da kórsetilmegen, − dedi A. Orynbek.

Zańger keıbir qorlardyń atqarǵan jumysy jaıly esh derek tappaǵanyn aıtty. Al dúkender men saýda sórelerindegi qaıyrymdylyq úshin qoıylǵan jáshikterdiń sanyn tipti belgisiz – kún sanap kóbeıip jatyr. Biraq ol aqshanyń da suraýy joq.

− Elimizde kúdik týdyratyn kúmándi qorlar arandatýshylar men radıkal toptardy qarjylandyrýy múmkin degen oımen memleketimizdiń bolashaǵyna, qaýipsizdigine alańdaımyn. Bul shuǵyl sheshýdi qajet etetin eń basty másele. Sondyqtan qor jumystarynyń jaýapkershiligin kúsheıtý maqsatynda zańǵa tıisti ózgertýler engizý týraly tapsyrma berýińizdi suraımyn, − dedi ol.

Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi.

Osy oraıda Kazinform tilshisi ótken quryltaılardyń nátıjesi jóninde sholý ázirlegen edi.