Kaspi bank sý tasqynynan zardap shekkenderge qol ushyn berýge 1,5 mıllıon teńge qarajat bóldi
ALMATY. Maýsymnyń 11-i. QazAqparat /Erlik Erjanuly/ - Kaspi bank naýryz aıynda sý tasqynynan zardap shekken Shyǵys Qazaqstan oblysy Jantikeı jáne Kókjyra aýyldarynyń turǵyndaryna 180 jınalmaly kereýet aparyp berdi,
dep habarlaıdy QazAqparat banktiń baspasóz qyzmetine silteme jasap.
Qazir baspanasyz qalǵan turǵyndar Kókjyra aýylyndaǵy mektepte turyp jatyr. Olar tamaqpen, kıimmen qamtamasyz etilgen. Tarbaǵataı aýdanynyń ákimdigi habarlaǵandaı, alaıda olar edende uıyqtaýǵa májbúr bolyp kelgen edi. Kaspi bank jınalmaly kereýet satyp alýǵa jáne ony jetkizýge 1,5 mıllıon teńge bóldi. Qazir qajetti zattar tıelgen KamAZ mashınalary Kókjyra aýylyna kelip jetti. Ony banktiń Óskemen qalasyndaǵy fılıalynyń qyzmetkerleri muqtaj turǵyndardyń qoldaryna tabys etti.
«Sý tasqynynan zardap shekken tarbaǵataılyqtarǵa qaıyrymdylyq kómek retinde mekemelerden, kásiporyndar men turǵyndardan túsken qarajat bizdiń bank arqyly kedergisiz aýdaryldy. Biz aýyl turǵyndarynyń ótinishimen jınalmaly kereýetterdi jetkizgen kezde, jerlesteriniń kómegi tıip jatqanyn óz kózimizben kórdik. Oǵan Kókjyra aýylynyń mańynda salynyp jatqan ondaǵan úıler kýá», deıdi Kaspi bank-tiń Óskemen qalasyndaǵy fılıalynyń dırektory Janat Turash. Jalpy sý tasqynynan zardap shekken turǵyndardyń jańa úılerin jazdyń aıaǵyna deıin salyp bitirý josparlanyp otyr. Ózderiniń bolashaq úıleriniń qurylysyna Jantikeı jáne Kókjyra aýyldarynyń turǵyndary da atsalysyp jatyr.
