Kaspi bank qyzmetkeri shabýyl oqıǵasyn bastan-aıaq aıtyp berdi
«Jumys kúni edi, biraq klıentter bolǵan joq. Áriptesimmen jumys týraly sóılesip otyrdyq. Bir kezde Á. Mýradov keldi. Men ony klıent dep oılap, amandastym. Ol birden áriptesimdi ustap, moınyna tapansha tárizdi qarýdy taqady. Biraq ol ras tapansha ma, bilmedim. Sodan keıin ol dórekilik tanytyp, barlyq esikti jaýyp tastady jáne bizdi óltiretinin aıtty, ıaǵnı maǵan barlyq esikti kiltpen jabýymdy buıyrdy. Men ne isterimdi bilmeı, bir orynda turyp qaldym. Sosyn men kúzetshige qaraı júgirdim, kómek surap, belgisiz bireýdiń kelgenin aıttym. Keıin kúzetshi syrtqa shyǵyp, qaıta kirmedi. Sosyn men kıim iletin jerdiń kiltin tabýǵa tyrystym, biraq taba almadym. Odan soń menedjer áriptesim ekeýmiz tynysh otyrdyq», - dedi sot barysynda bank qyzmetkeri ári zardap shegýshi.
Onyń aıtýynsha, osy arada olar polıtsııaǵa habarlasyp úlgergen.
«Bir kezde shabýyldaýshy bizge aıqaılaı bastady, ne istep jatqanymyzdy surady. Sodan soń ol maǵan deldal bolatynymdy aıtyp, qaǵazǵa búkil talaptaryn jazýdy surady. Atap aıtqanda, kúzetshiniń qaıtyp oralýyn jáne banktiń aqshasyn aýdarýdy talap etti. Onyń talaptaryn qaǵazǵa jazyp, shyǵa beris esiktiń janyna qaldyrdym. Odan ári polıtsııa qyzmetkerleri alyp ketti. Sosyn áriptesim ekeýmiz kassanyń artynda 2-3 saǵat tyǵylyp otyrdyq. Birazdan soń ol bárin jaryp jiberetinin aıtyp aıqaılady jáne ǵımaratqa eshkimniń kirmeýin talap etti. «Men qyzmetkerlerdi aıaımyn, eshkimge zııan tıgizgim kelmeıdi, biraq solaı bolýy kerek» dedi», - dep tolyqtyrdy zardap shegýshi.
Sondaı-aq, oqıǵa kýágeri bir saǵattan keıin kúdiktiniń kelissózder bólmesine kirgenin aıtty.
«Sol sátte men ata-anama habarlama jibere bastadym. Kassa jabyq boldy, men eshteńe estimedim. 3 saǵat kelissózden keıin arnaıy kúshter men polıtseıler ketip qaldy. Sodan soń bir nárse jaryldy, arnaıy kúsh mamandary tez ketýimizdi surady. Osylaısha bizdi syrtqa alyp shyqty, edende qan izderi boldy», - deıdi bank qyzmetkeri.
Aıta keteıik, sot otyrysy aldynda sýdıa kýágerler men zardap shekkenderge qatysty jeke málimetterdi (aty-jóni, qyzmeti, t.b.) jarııalaýǵa tyıym saldy. Sot otyrysy búgin saǵat 15:00-de jalǵasady.
Buǵan deıin kýáger bank ǵımaratyna shabýyldaýshy azamattyń ápkesiniń emine aqy talap etkeni týraly málim etken edi.
Eske sala ketsek, bıyl 18 maýsymda qarýlanǵan er adam elordadaǵy Kaspi bank ǵımaratynda birneshe kisini tutqynda ustap otyrdy.
Araǵa ýaqyt salyp atalǵan banktiń baspasóz qyzmeti ǵımaratta klıentterdiń joqtyǵyn jáne polıtsııa qyzmetkerleriniń kúdiktimen kelissóz júrgizip jatqanyn málimdedi.
Oqıǵa ornyna Іshki ister mınıstri Marat Ahmetjanov bardy.
Polıtsııa qyzmetkerleri kepildegi azamattardy bosatyp aldy.
23 tamyzda Kaspi Bank ǵımaratyna jasalǵan shabýyl boıynsha qylmystyq is sotqa jetkenin habarlaǵan edik.
Aıta keteıik, 29 tamyzda ótken alǵashqy sot otyrysynda Kaspi Bank ǵımaratyn basyp alǵan jigit onyń aldynda ózin óltirý úshin dári ishkeni belgili boldy.
