Kaspi Bank aktsıonerleri bank klıentteri men seriktesteri úshin arnaıy málimdeme jasady
ASTANA. QazAqparat - Kaspi Bank aktsıonerleri ózderiniń klıentteri men seriktesteri úshin arnaıy málimdeme jasady. «QazAqparat» osy málimdemeniń mátinin jarııalaıdy.
Taıaýdan beri qazaqstandyq bankter tóńireginde túrli qaýesetter jıilep ketti. SMS-habarlamalar arqyly taralǵan bul sybystar, ásirese, depozıti bar jurtshylyqtyń alańdaýshylyǵyn týǵyzdy. Bul sondaı-aq kommertsııalyq bankterdiń jumysyn kúrdelendire tústi.
Atalǵan jaǵdaı teńgeniń qunsyzdanýyna baılanysty jaǵdaıda jalpy halyqty úreıge saldy. Alaıda, devalvatsııaǵa qatysty másele men kommertsııalyq bankterdiń jumysynyń ara jigin ajyratyp qaraǵan jón.
Belgisiz bireýlerdiń jibergen arandatýshylyq sıpattaǵy sms-habarlamalarǵa senýge esh negiz joq.
Osyǵan baılanysty Kaspi Bank menedjmenti men aktsıonerleri Mıhaıl Lomtadze jáne Vıacheslav Kım bolǵan jaǵdaıǵa baılanysty óz ustanymdaryn málimdeıdi.
«Qazaqstannyń bank naryǵynda turaqsyz jaǵdaı birinshi ret oryn alyp otyrǵan joq. Qurylǵannan beri osy kezge deıin biz jaqsy tájirıbe qalyptastyrdyq jáne Kaspi Bank-tiń óziniń barlyq mindetterin árqashan oryndap, klıentteriniń múddesin tolyqtaı oryndaıtynyn maqtanyshpen aıta alamyz.
Kaspi Bank klıentterimizdiń barlyq suranystaryn oryndady, oryndap jatyr jáne aldaǵy ýaqytta da oryndaıdy. Búginniń ózinde banktiń elimizdegi bólimderine qolma-qol aqshanyń kólemi ádettegiden 5 ese kóp engizildi. Klıentterimizge qansha qarajat qajet bolsa, sonsha jetkiziledi.
Kaspi bank Qazaqstanda kópten beri jumys istep kele jatqan jalǵyz bank. Klıentterimizge yńǵaıly bolý úshin biz aptasyna 7 kún, saǵat 20.00-ge deıin jumys isteımiz.
Eger klıentterimiz bizdiń bankpen qarym-qatynasyn úzýge tilek bildirse, biz erejege saı olardyń suranystaryn qanaǵattandyramyz.
Kaspi Bank aktsıonerleri mol resýrstar men aktıvterge ıe. Ol qajet bolǵan jaǵdaıda klıentteriniń suranysyn qanaǵattandyrý úshin osy resýrstardy paıdalanýǵa ázir ekenin resmı túrde málimdeıdi.
Kaspi Bank-tiń ınvestory 3,7 mıllıard AQSh dollarynan astam kapıtaly bar Baring Vostok Capital Partners jetekshi ınvestıtsııalyq qory bolyp tabylady.
Kaspi Bank-tiń iskerlik bedelin tómendetý úshin aıtylyp jatqan kez kelgen málimdeme jalǵan, arandatýshylyq sıpatta jáne josyqsyz básekeniń kórinisi.
Biz jaqyn arada naryqtaǵy jaǵdaı turaqtalyp, adal klıentterimizben birge damýdyń jańa satysyna kóshemiz degen senimdemiz.
Biz, Mıhaıl Lomtadze, Vıacheslav Kım kaspi bank menedjmenti men aktsıonerleri retinde klıentterimizdiń senimderin aqtap, olardyń aldyndaǵy barlyq mindetterimizdi oryndaımyz dep málimdeımiz.
Banktiń tabysty jumysy, onyń Qazaqstandaǵy jetekshi jáne iri bank retindegi jetistikteri men bizdiń óz klıentterimizben ashyq sóılese alatyndyǵymyz - munyń barlyǵy sizderdiń múddelerińizdiń saqtalyp, qorǵalatyndyǵynyń kepili bolmaq».
