Kasperskıı zerthanasy qazaqstandyq jas ǵalymdarǵa grant beredi
ALMATY. 14 qańtar. QazAqparat - Kasperskıı zerthanasy jas ǵalymdardyń aqparattyq qaýipsizdik salasyndaǵy ǵylymı-zertteý jobalaryn júzege asyrýǵa grant berý baǵdarlamasynyń aıasyn keńeıtedi.
Tuńǵysh ret reseılik qatysýshylardan basqa oǵan endi TMD-nyń basqa elderiniń, sonyń ishinde Qazaqstannyń zertteýshileri qatysa alady.
Grantqa úmitkerlerdiń barlyǵyna zertteý úshin ІT salasyndaǵy zııan keltirýshi jáne qaýipti bolýy múmkin baǵdarlamalardyń jiktelýi, kıberqaýipterdi anyqtaý jáne taldaý ádisteri, korporatıvtik ortadaǵy aqparattyq qaýipsizdik, kontent taldaýy, mobıldik qurylǵylardyń qaýipsizdigi sııaqty kókeıkesti mindetterdiń birin tańdaý usynylady.
Qazylar alqasy tańdaǵan bes úzdik avtor ózderiniń jobalaryn Kasperskıı Zerthanasynyń qoldaýymen iske asyrý múmkindigine ıe bolady. Kompanııa árbir jeńimpazǵa ǵylymı-zertteý jumystaryn ótkizýge 100 myń rýbl bóledi, statıstıkalyq málimetterdi izdeý boıynsha kómek beredi, al onyń sarapshylary keńes berý arqyly qoldaýyn kórsetedi.
Daıyn jobalardyń tusaýkeseri jyldyń sońynda Máskeýde ótedi. Grantqa ótinimder 2013 jyldyń 13 naýryzyna deıin academy@kaspersky.com meken-jaıy boıynsha qabyldanady. Jeńimpazdar 15 sáýir kúni belgili bolady. Jobamen jumys isteýge 7 aı bólingen. Ǵylymı zertteýlerdiń qorytyndylary 2013 jyldyń 2 jeltoqsanynda usynylady.
