Qasqyrdy tirideı satpaq bolǵan shyǵysqazaqstandyqqa aıyppul salyndy

ÓSKEMEN. QazAqparat - Óskemenniń irgesindegi Ýshan aýylynyń turǵyny qasqyrdyń qurtqasyn (urǵashy - avt.) tirideı satpaq bolǵan. Tabıǵat qorǵaý ınspektsııasy habarlandyrý ıesine aıyppul salyp, isin sotqa tapsyrdy,  dep habarlaıdy QazAqparat tilshisi.

Habarlandyrý saýda saıttary men Instagram jelisi arqyly taraǵan.

«Qurtqa 10 aılyq. Katonqaraǵaıdan ákelingen. Qolǵa ábden úırengen. Qarǵybaýsyz júre beredi, qashpaıdy. Ózim Astanaǵa kóshetin bolǵandyqtan satýǵa májbúrmin» - delingen habarlandyrýda.  Tabıǵat qorǵaý ınspektsııasynyń mamandary habarlandyrý ıesimen satyp alýshy retinde baılanysqa shyǵyp, qasqyrdy kórýge ýaǵdalasady. Ýshan aýylyna barǵanda resmı organ ókilderi jyrtqyshtyń rasynda shynjyrǵa baılanǵanyn kórgen. Qasqyr satýshy óziniń bul áreketi zańsyz ekenin bilmegenin aıtyp aqtalypty.

«Bizdiń mamandar barǵan kezde qasqyr asyraýshy habarlandyrýdy dostary ázildep salǵanyn aıtty. Jabaıy ańdy asyraý úshin resmı orynnan ruqsat alý kerektigin bilmese kerek. Oǵan 10 AEK kóleminde aıyppul salyndy. Ári qaraı isti sot qaraıdy. Onyń ústinen ákimshilik is qozǵaldy. Sot kem degende qasqyrdy ıesinen tárkileý týraly sheshim shyǵarýy tıis. Oǵan deıin jyrtqysh «ıesiniń» úıinde bolady. Tárkilengen soń ony ne zoobaqqa ótkizemiz, ne tabıǵatqa erkindikke jiberemiz» - deıdi tabıǵı resýrstar jáne tabıǵat paıdalanýdy retteý basqarmasynyń ókili Arman Esentaev.

Onyń aıtýynsha, qandaı da bir ańdy asyraý úshin arnaıy qujattar jınap, ruqsat alý kerek. Odan keıin de ańnyń ıesi ony durys jaǵdaıda asyrap otyrǵanyn dáleldeıtin esepter ótkizip turady.

«Al satqysy kelse, ózi sııaqty arnaıy ruqsaty bar tulǵalar men mekemeler ǵana satyp ala alady. Bul azamatta atalǵan qujattardyń eshqaısy bolmaǵan. Memleketke óz erkimen ótkizgende bulaı bolmas edi. Ǵalamtorǵa habarlandyrý ornalastyrýy zańbuzýshylyq bolyp sanalatyndyqtan, ákimshilik shara qoldanýǵa týra keldi» - deıdi Arman Esenetaev.