Qasqyr sarqyramasy: Aqtóbe oblysynda ekotýrızm damı bastady

AQTÓBE. QazAqparat – Aqtóbe oblysyndaǵy Qasqyr sarqyramasy ekotýrızm aımaǵyna aınalady. Óńir basshysy Ońdasyn Orazalın Qarǵaly aýdanyna jumys saparynda jańa jobany kórip shyqty, dep habarlaıdy QazAqparat tilshisi.

Mundaǵy sharýa qojalyǵy «Bıznestiń jol kartasy-2025» baǵdarlamasy aıasynda jalpy somasy 49,4 mln teńgege ınfraqurylymdy damytý jumysyn júrgizip jatyr. Osy memlekettik baǵdarlama aıasynda «Baıqula» ShQ jalpy somasy 5 mıllıon teńgege grant ta utyp aldy. Búgingi tańda 4 kıiz úı, 2 glempıng, 2 katamaran jáne 2 qaıyq satyp aldy. Sarqyramaǵa baqylaý kópiri salyndy. Munda úıler men monsha da bolady.
Oblys ákimi Ońdasyn Orazalın jobaǵa oń baǵa berip, oblystyń barlyq aýdanynda týrızmdi damytýǵa tapsyrma berdi.
«Týrızm – ekonomıkanyń erekshe, damyp kele jatqan salasy. Ol kóptegen jumys ornyn qamtamasyz ete alady. Memleket salany qoldaý jáne damytý jóninde birqatar shara qabyldady. Memlekettik baǵdarlama men granttyń arqasynda Qasqyr sarqyramasyndaǵy jumys buǵan aıqyn mysal bola alady. Bul baǵyttaǵy jumystar barlyq aýdanda jalǵasýy tıis», - dedi Ońdasyn Orazalın.

Óńir basshysy Qarǵaly aýdanyna jumys saparynda eldi mekenderdi abattandyrý jobalaryn iske asyrý jáne astyq jınaý naýqanynyń barysymen tanysty. Petropavlov aýylynda qazirgi ýaqytta ortalyq saıabaqty abattandyrý júrip jatyr.
«Maýsym aıynda qurylysty bastadyq, búginde az ǵana jumysy qaldy. Jańa qorshaý salyp, sahna men balalar oıyn alańyn ornattyq. Qyrkúıektiń ortasyna deıin aıaqtaımyz», - dedi merdiger kompanııa dırektory Aıbek Qurmanalın.
Aýylda sondaı-aq quny 316 mln teńge bolatyn angar úlgisindegi dene shynyqtyrý-saýyqtyrý kesheni salynyp jatyr. Osyǵan uqsas dene shynyqtyrý-saýyqtyrý keshenin oblys ákimi Qos-Estek aýylynda qarap shyqty. Eki nysan da jyl sońynda deıin ashylady dep josparlanǵan.
«Qarǵaly aýdanynda taǵy bir dene shynyqtyrý-saýyqtyrý kesheni salynyp jatyr. Ol osy ýaqytqa deıin problemaly nysan bolǵan. Qazir qurylys qaıta jandandy. Jyl sońyna deıin Qarǵaly aýdanynda 3 dene shynyqtyrý-saýyqtyrý kesheni paıdalanýǵa beriledi. Jumys tolyq kólemde, keste boıynsha júrgizilýde», - dep esep berdi qurylys, sáýlet jáne qala qurylysy basqarmasynyń basshysy Naǵymjan Aldııarov.
Sondaı-aq Qos-Estekte oblys ákimi «Qýanysh» sharýa qojalyǵynyń egin jınaý jumystarymen tanysyp, aýdannyń iri sharýa qojalyq basshylarymen kezdesti.