«Qasqyrdy baılap qoıǵan»: Abaı oblysynda jelide taraǵan vıdeoǵa qatysty polıtsııa tekserý júrgizdi

SEMEI. KAZINFORM – Abaı oblysynda qasqyrdy baılap qoıǵandardyń vıdeosyna baılanysty polıtsııa tekserý júrgizdi.

Áleýmettik jelide taraǵan vıdeoda Úrjar aýdany Taskesken aýylynda arqanmen aǵashqa baılanǵan túz taǵysyna qatygezdik jasalǵany aıtylǵan. 

Aqparatty tekserý úshin polıtsııa qyzmetkerleri sol jerge bardy. Belgili bolǵandaı, bul vıdeo Qarakól aýylyndaǵy «Birinshi ferma» qystaǵynda túsirilgen.

- Tekserý barysynda vıdeodaǵy janýar Borıa esimdi qasqyr men haskı aralas tuqymdasy ekeni anyqtaldy. Janýar mamyr aıynda bir jasqa tolady. Onyń ıesi bar jáne ol mal baǵýǵa kómektesedi. Osylaısha, janýarǵa qatygezdik tanytý belgileri anyqtalǵan joq. Itti ustaý jaǵdaıy belgilengen talaptarǵa sáıkes keledi, - dep habarlady oblystyq Polıtsııa departamentinen.

Eske salsaq, osyǵan deıin Qyzylordada bıologııalyq tepe-teńdikti saqtaý úshin qasqyr aýlanyp jatyr.