Qaskeleńdegi jarylys: zardap shekken ekinshi adam kóz jumdy
ALMATY OBLYSY. QazAqparat – Almaty oblysyndaǵy Qarasaı aýdanynyń Qaskeleń qalasynda bolǵan jarylys saldarynan ekinshi adam kóz jumdy, dep habarlaıdy QazAqparat tilshisi.
«Búgin keshki saǵat 17:00-der shamasynda aýrýhanada 1939 jylǵy, ıaǵnı 81 jastaǵy qart kisi kóz jumdy», - dep málimdedi Qarasaı aýdany ákiminiń baspasóz qyzmeti.
Qarasaı aýdanynyń ákimi Jandarbek Dalabaev zardap shekken turǵyndarmen kezdesip, qal-jaǵdaılaryn bildi. Qaza bolǵan otbasyna baryp kóńil aıtyp, qaıǵylaryna ortaqtasty. Qazirgi tańda zardap shekken otbasylarǵa ýaqytsha baspana usynylǵan. Ol shyǵyndardyń barlyǵyn ákimdik ótep beretinin jetkizdi.
Esterińizge sala keteıik, búgin Almaty oblysynyń Qarasaı aýdanyna qarasty Qaskeleń qalasynda gaz aýa qospasy jarylyp, 7 adam jaraqattanǵanyn, bir balanyń oqıǵa ornynda jan tapsyrǵanyn buǵan deıin habarlaǵan bolatynbyz.
