Qaskeleńdegi ınfektsııalyq aýrýhana jabylmaıdy - ákimdik
TALDYQORǴAN. QazAqparat - Almaty oblysyndaǵy Qaskeleń qalalyq ınfektsııalyq aýrýhana jabylmaıtyn boldy. Bul jóninde oblys əkiminiń orynbasary Jaqsylyq Omar málim etti, dep habarlaıdy QazAqparat tilshisi.
Oblys ákiminiń orynbasary Qaskeleń qalalyq ınfektsııalyq aýrýhanasyn jabylýyna qatysty agenttik tilshisiniń saýalyna jaýap berdi.
«Búgingi kúni Almaty oblysynda aýyr ınfektsııalyq aýrýmen syrqattanǵandarǵa medıtsınalyq kómek kórsetetin eki ınfektsııalyq aýrýhana jumys isteıdi: Taldyqorǵan qalasyndaǵy 100 tósektik aımaqtyq ınfektsııalyq aýrýhana jáne 120 oryndyq Qaskeleń qalalyq ınfektsııalyq aýrýhanasy.
Qaskeleń qalalyq ınfektsııalyq aýrýhanasy Qarasaı aýdanynyń syrqattaryn ǵana emes, sonymen qatar Jambyl, Іle, Talǵar aýdandary men Qapshaǵaı qalasynan da aýrýlar qabyldaıdy. Infektsııalyq aýrýhanada jylyna orta eseppen jeti myń adam emdeledi (Almaty qalasyndaǵy 180 tósektik ınfektsııalyq aýrýhanada jylyna 8 000 naýqas emdeledi). Aýrýhana qoldanystaǵy sanıtarlyq normalar men erejelerge sáıkes salynǵan, ıaǵnı ınfektsııalyq aýrýlardy bólekteý úshin jeke oqshaýlanǵan palatalar men jeke shyǵý esikteri qarastyrylǵan. Bul ınfektsııalyq aýrýlardyń aýa-tamshyly jolmen taralýyna jol bermeıdi», dep málim etti ol.
Onyń málimetinshe, aýrýhana aýdan halqy men óńirde jumys isteıtin kórshi memleketterdiń azamattaryna medıtsınalyq qyzmet kórsetedi.
«Aýrýhanada tájirıbesi mol, joǵary bilikti medıtsına mamandary jumys isteıdi, aýrýhana jabylǵan jaǵdaıda kadrlardy joǵaltyp alamyz. 345 tósektik statsıonary bar Qarasaı aýdandyq ortalyq aýrýhana aýdan halqyna medıtsınalyq qyzmet kórsetýdi qamtamasyz etip otyr, sondaı-aq respýblıkalyq jáne halyqaralyq trassalarda oryn alǵan jol apattarynan zardap shegýshilerdi qabyldaıdy (Almaty - Astana, Almaty - Bishkek, Almaty - Tashkent jáne t.b.). Sonymen qatar aýdan aýmaǵynda kóptegen bazarlar bar jáne olarda oblystyń ár túkpirinen, kórshi memleketterden kelgen ınfektsııalyq aýrýmen aýyrý qaýpi joǵary birneshe júzdegen myń adam jumys isteıdi. Osyǵan oraı birqatar obektıvti sebepterge baılanysty Qaskeleń qalalyq ınfektsııalyq aýrýhanasyn jaýyp, onyń aýyr ınfektsııalyq aýrýlardy emdeý fýknktsııasyn Qarasaı aýdandyq ortalyq aýrýhanasyna berý múmkin emes», - dedi J. Omar.
Oǵan qosa oblys ákimdigi Qarasaı aýdandyq ortalyq aýrýhanasy bazasynda ınfektsııalyq bólim ashý sharalaryn qolǵa alatyn bolady. Ol ınfektsııalyq aýrýlardyń aýyr emes túrlerimen aýyrǵan syrqattardy qabyldaı alady.
Sondaı-aq, jýyq arada Qaskeleń qalalyq ınfektsııalyq aýrýhanasyn kúrdeli jóndeýden ótkizýge qarjy bólinetin málim etti.
Esterińizge sala keteıik, Qaskeleń juqpaly aýrýlar aýrýhanasynyń jabylatyndyǵy jóninde Almaty oblysyndaǵy issapary barysynda Densaýlyq saqtaý mınıstri Eljan Birtanov aıtqan bolatyn.
