Qaskeleńde reformalardaǵy qoǵamdyq birliktiń mańyzy aıtyldy
ASTANA. KAZINFORM — Búgin Qaskeleń qalasynyń Mádenıet úıinde Memleket basshysy Qasym-Jomart Toqaevtyń 28 qazanda jarııalaǵan «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn túsindirýge arnalǵan kezdesý ótti.
Jıynǵa Qazaqstan Respýblıkasy Energetıka vıtse-mınıstri Qaıyrhan Serikuly Tutqyshbaev, «Ádilet» partııasynan Qazaqstan Respýblıkasy Quryltaıynyń I shaqyrylymynyń depýtaty, Áleýmettik-mádenı damý komıtetiniń múshesi Arman Serikuly Jansengirov jáne Qazaqstan Halyq Keńesiniń múshesi Nursultan Jumabaıuly Orynbasarov qatysty. Sonymen qatar kezdesýge aýdannyń bilim salasynyń ókilderi men jastar qatysty.
Kezdesý barysynda spıkerler Memleket basshysynyń Joldaýynda aıqyndalǵan basym baǵyttarǵa toqtalyp, eldiń áleýmettik-ekonomıkalyq damýy men qoǵam aldyndaǵy ózekti mindetter jóninde pikir bildirdi.
Alǵashqy bolyp sóz alǵan Energetıka vıtse-mınıstri Qaıyrhan Serikuly Tutqyshbaev energetıka salasyn damytý, eldiń energetıkalyq qaýipsizdigin qamtamasyz etý, ınfraqurylymdy jańǵyrtý jáne salanyń turaqty damýy baǵytyndaǵy mindetterge toqtaldy.
Óz kezeginde Quryltaı depýtaty Arman Serikuly Jansengirov áleýmettik-mádenı salany damytýǵa baǵyttalǵan bastamalarǵa toqtalyp, bilim berý júıesin jetildirý, ınklıýzıvti bilim berýdi damytý, erekshe bilim berý qajettilikteri bar balalarǵa qolaıly jaǵdaı jasaý jáne pedagogterdiń mártebesin arttyrý máselelerin atap ótti.
Al Qazaqstan Halyq Keńesiniń múshesi Nursultan Jumabaıuly Orynbasarov óz sózinde Joldaýda belgilengen ekonomıkalyq jáne áleýmettik reformalardyń mańyzdylyǵyna nazar aýdardy. Atap aıtqanda, «Halyqtyq qurylys» baǵdarlamasy aıasynda mektepter, aýrýhanalar men ózge de áleýmettik nysandar salý, aýyl sharýashylyǵyn qoldaý, óńirlerdiń ınfraqurylymyn damytý jáne azamattardyń tabysyn arttyrý baǵyttaryn atap ótti. Sonymen qatar reformalardy júzege asyrýda qoǵamdyq birlik, zań men tártip jáne adal eńbektiń mańyzyn jetkizdi.
Jıynda bilim berý salasyna qatysty mindetter de keńinen talqylandy. Atap aıtqanda, bilim berý ınfraqurylymyn jetildirý, bilikti mamandar tapshylyǵyn azaıtý, muǵalimderdiń jumys júktemesin ońtaılandyrý jáne artyq eseptilik pen qaǵazbastylyqty joıý máselelerine erekshe nazar aýdaryldy.
Memleket basshysy óz sózinde: «Ustazdyń negizgi mıssııasy — balaǵa sapaly bilim berý, ıaǵnı saýatty, sanaly urpaq tárbıeleý», — dep atap ótip, pedagogterdiń negizgi jumysyna kedergi keltiretin artyq eseptilik pen qaǵazbastylyqty joıý qajettigin tapsyrǵan bolatyn.
Sondaı-aq erekshe bilim berý qajettilikteri bar balalarǵa arnalǵan ınfraqurylymdy damytý, tıisti mamandarmen qamtamasyz etý jáne balalardyń damý erekshelikterin erte jastan anyqtaý jumystarynyń mańyzdylyǵy aıtyldy.
Kezdesý sońynda qatysýshylar ózderin tolǵandyrǵan saýaldaryn qoıyp, arnaıy kelgen spıkerlermen ashyq pikir almasty. Jıyn barysynda kóterilgen máseleler boıynsha usynystar aıtylyp, ózekti suraqtarǵa jaýap berildi.
