Qaskeleńde Ózbekstan azamaty tapa-tal túste oqýshy qyzǵa tap berdi
QASKELEŃ.QazAqparat - Almaty oblysynda Ózbekstan azamaty tapa-tal túste oqýshy qyzǵa tap berdi. Oqıǵa Almaty oblysynyń Qaskeleń qalasynda bolǵan, dep habarlaıdy QazAqparat tilshisi.
«Bul oqıǵa 16 qarasha kúndizgi saǵat 13:00 shamasynda Qarasaı aýdanynyń Qaskeleń qalasyndaǵy Qarasaı batyr kóshesinde bolǵan. Osy jaıtqa baılanysty polıtsııaǵa kómek surap habarlasty. Oqıǵa ornyna jetkende tártip saqshylaryna áıel adam aryzdanyp, onyń 12 jasar qyzyna shamamen 35-40 jastaǵy er adamnyń tap bergenin jetkizgen»,- delingen Almaty oblystyq polıtsııa departamenti baspasóz qyzmetiniń habarlamasynda.
Vedomstvonyń aqparatyna sáıkes, atalǵan fakti boıynsha 39 jastaǵy er adam ustalyp, Qarasaı aýdanynyń polıtsııa basqarmasyna jetkizildi.
«Kámelet jasyna tolmaǵan N. esimdi oqýshynyń aıtýy boıynsha, ol mektepke bara jatqanda artynan belgisiz er azamat kelip, tap berip, aqsha talap etken. Biraq oqýshy odan qutylyp, qaıta mektepke qaraı júrgen. Biraq sol er azamat dál aıaldamanyń tusynda oqýshy qyzǵa qaıta tap berip, kúshpen aıaldamanyń oryndyǵyna otyrǵyzyp qoıǵan. Sol sátte ózge adamdar oqýshy qyzǵa kómekke kelip, al tap bergen er azamat oqıǵa ornynan qashyp ketken»,- delingen vedomstvonyń habarlamasynda.
Qazir atalǵan fakti QR QK 191 babynyń 24 baby 3 tarmaǵy boıynsha tirkeldi. Tergeý barysynda qajetti saraptamalar taǵaıyndalady.
«Ustalǵan er adam - Ózbekstan eliniń azamaty. Ol 30 táýlikke qamaýǵa alyndy»,- dep tolyqtyrdy polıtsııanyń baspasóz qyzmeti.
Aıta keteıik, belgisiz azamattyń oqýshy qyzǵa tap bergen sáti beınebaqylaý kamerasyna jazylǵan.
