Qaskeleńde qurylys kompanııasy úı salý úshin ózenniń arnasyn buryp jibergen
Almaty oblysynyń prokýrorlary oblys aýmaǵynda kóppáterli turǵyn úı keshenderiniń jáne kommertsııalyq obektilerdiń qurylysyna taldaý júrgizdi, dep habarlaıdy Kazinform.
Taldaý nátıjesi boıynsha qurylys normalary men erejesin buzý faktileri anyqtaldy.
Máselen, 19 nysan boıynsha qabyldanǵan sharalardyń arqasynda (Qonaev — 11, Qarasaı aýdanynda — 5, Talǵar aýdanynda -3) zańsyz alynǵan bastapqy materıaldar keri qaıtaryldy, ıaǵnı qurylys bastalǵanǵa deıin protsess toqtatyldy.
KTK zańsyz qurylysynyń bastalý faktileri boıynsha (Qonaev qalasyndaǵy 5 obekt jáne Qarasaı aýdanyndaǵy 1 obekt boıynsha) qurylys salýshylar ákimshilik jaýapkershilikke tartyldy.
Mysaly, qurylys salýshy Qarasaı aýdanynyń Qaskeleń qalasyndaǵy ózen arnasyn zańsyz ózgertip, «Orda Town» KTK qurylysyn bastaǵan.
Qabyldanǵan sharalar boıynsha ýákiletti organ qurylysty toqtatty, sotta zańsyz qurylysty buzý týraly talap-aryz qaralady.
Basqa jaǵdaıda Talǵar aýdanynda qurylysqa ruqsat qujaty joq 21 kommertsııalyq nysan anyqtaldy.
Engizilgen akt boıynsha ýákiletti organ qurylys salýshylardy tıisti jaýapkershilikke tartýǵa jáne anyqtalǵan buzýshylyqtardy joıý boıynsha, onyń ishinde salynyp jatqan obektilerdi buzý jolymen eldi mekenderdiń qurylys talaptary men qurylys salý josparlaryna sáıkes kelmeıtin jumystardy júrgizýge baǵdarlanǵan.
Mysaly, Besaǵash kentinde Almaty-Qorǵas negizgi tas jolynyń boıynda jeke tulǵa saýda ortalyǵynyń qurylysyn bastady.
Ýákiletti organdardyń málimetterine sáıkes atalǵan qurylys tıisti jobalaý qujattarynsyz, sondaı-aq qurylys baqylaýy salasyndaǵy organnyń ruqsatynsyz bastaldy.
Qazirgi ýaqytta ýákiletti organ qurylys salýshy qurylys jáne ruqsat berý qujattamasyn zań normalaryna sáıkes keltirgenge deıin qurylysty toqtata turý jóninde sharalar qabyldady. Obekt qoldanystaǵy normalarǵa sáıkes kelmegen jaǵdaıda atalǵan qurylysty buzý máselesi sheshiletin bolady.
Budan basqa, prokýratýra aktisi boıynsha 3 jer ýchaskesiniń nysanaly maqsatyndaǵy zańsyz ózgeristerdi sáıkestendirý jáne zańsyz berilgen 48 ýchaskeni turǵyn úı keshenderiniń qurylysyna qaıtarý boıynsha jumystar júrgizilýde.
Ekologııalyq qorytyndysyz qurylys faktileri boıynsha oblystyń 3 aýdanynyń jáne Qonaev qalasynyń 26 qurylys salýshysy ákimshilik jaýapkershilikke tartyldy (9 mln teńgeden astam aıyppul somasy).
Atalǵan buzýshylyqtardan basqa oblystyń qurylys salýshylary ýákiletti organnyń tıisti ruqsatynsyz úleskerlerdiń qarajatyn tartýdy jalǵastyryp jatyr.
Barlyǵy osyndaı 23 turǵyn úı kesheni anyqtaldy (Qonaev qalasynda 9 obekt, Qarasaı aýdanynda 5, Talǵar aýdanynda 8, Іle aýdanynda 1 obekt), qurylys salýshylardyń isi sotta qaralyp jatyr.
Atalǵan buzýshylyqtarǵa nazar aýdara otyryp, oblys prokýratýrasy salynyp jatqan obektiden turǵyn úı satyp alǵysy keletin azamattarǵa «úlestik qurylys týraly» zańnamanyń negizgi normalary týraly túsindiredi.
«Sonymen, qurylys kompanııasyn tańdaǵanda birqatar quqyq belgileıtin qujattarǵa nazar aýdarý qajet. Úı salynyp jatqan jer ýchaskesine menshik quqyǵy qurylys salýshynyń kompanııasynda tirkelýi kerek. Sondaı-aq, qurylys salýshynyń memlekettik saraptamadan ótken jobalaý-smetalyq qujattamasy jáne ýákiletti organnyń qurylysqa ruqsaty bolýy tıis. Negizgi qujat — jergilikti atqarýshy organnyń qaýlysy túrindegi úleskerlerdiń qarajatyn tartýǵa ruqsat. Bul rette atalǵan qujattardyń bolýy satyp alýshynyń quqyqtaryn odan ári qorǵaýǵa jáne salynǵan aqsha qarajatynyń saqtalýyn qamtamasyz etýge múmkindik beredi» deıdi Bas prokýratýradan.
